Янгиланган Kia Soul тақдимотдан сўнг сотувга чиқарилади

Янгиланган Kia Soul кроссоверининг спортча версияси ишлаб чиқилди. Кроссоверга бензинли 1,6 T-GDI турбомотор ўрнатилади, унинг қуввати 204 от кучига тенг. Турбомотор юз тезликка 7,8 сонияда чиқиш имконини беради. Soul GTнинг максимал тезлиги эса соатига 200 км.

Модификацияга аввалгидан кучлироқ тормоз механизми ўрнатилган. Катта ҳавотортарли (воздухозаборник) тажовузкор бамперлар, тутун чиқариш қувурчаси ва 18 дюймли ғилдирак дисклари автомобилга хосдир. Машина салонига чарм ва мато қопланган.

Kia Soulнинг оддийроқ модификацияси ҳам бўлиб, диодли ксенон фараси, орқа чироқлари билан ажралиб туради.

Soulда ҳаракатланиш режимларини танлаш функцияси бор. У орқали оддий, экологик ва спортча иш режимини танлаш мумкин. Автомобилнинг 5, 7 ва 8 дюймли мониторга эга медиатизимлари мавжуд. Apple CarPlay ва Android Auto платформаси ишлайди. Салоннинг орқа қисмида қурилмаларни зарядлаш учун USB-улагичлар ўрнатилган. Янгиланган Kia Soul “кўринмас зона”ларни кузатиш тизими билан жиҳозланган.

Янгиланган Kia Soul спортча GT версияси билан бирга Парижда намойиш этилганидан кейин дарҳол Европада сотила бошлайди.

Бундан ташқари Парижда янгиланган Kia Carensнинг намойиши ҳам кутилмоқда. Етти ўриндиқли минивэн катта ўзгаришга учрамаган, атиги ўриндиқларининг жилди ва медиатизими ўзгарган. Минивэн ҳам октябрдан бошлаб Европада сотилади.