Электромобиль соатига 576 км тезликда ҳайдагани видеоси тарқалди

3000 от кучига эга Venturi Buckeye Bullet-3 болиди максимал тезлигини 576 км/соатга, ўртача тезлигини эса 549,43 км/соатга чиқариб биратўла икки тезлик рекордини ўрнатганини CNN хабар қилди.

Болидни Venturi компанияси Монакодаги қароргоҳида Оҳайо университети талабалари билан ҳамкорликда ишлаб чиққан. Машинанинг икки электромотори бор. Двигателлар вазни 1,6 тонна бўлган литий-темир-фосфатли аккумуляторлардан озиқланади. Ўз навбатида Venturi Buckeye Bullet-3 вазни 3,5 тоннага тенг.

Иккала рекорд ҳам Халқаро автомобиль федерацияси (FIA) вакиллари иштирокида қайд этилди. “Вентури”ни пойгачи Рожер Шроер бошқарди.

Venturi компаниясининг асосчиси бу кунни уч йил кутишга тўғри келгани ҳақида гапирди. Бунга қадар рекорд ўрнатиш учун об-ҳаво халақит берган. Компания вакиллари натижадан қониқиш ҳосил қилишди ва келгуси рекордни (708 км/соат) ўрнатишга ҳаракат бошлаб юборишди.