Америкалик тиш шифокорига италияликлар ноёб суперкар ясаб берди

Дайтон пойга трассасидаги Finali Mondiali фестивали доирасида Ferrari SP275 RW суперкари тақдим этилди. У америкалик тиш шифокори Рик Уоркманнинг буюртмаси бўйича яккаю ягона нусхада тайёрланган.

Суперкардаги RW қўшимчаси шифокор жанобларининг исм-шарифи бош ҳарфини англатади. Машинанинг ташқи кўриниши бошқа русумлардан мутлақо фарқ қилади.

Суперкар 1964 йилда ишлаб чиқарилган Ferrari 275 GTB автомобилидан андоза олиб ишланган. Бор йўғи уч нусха тайёрланган Ferrari 275 GTB кимошди савдосида 80-90 млнлик чўққини забт этиши мумкин. Аммо тарихий суперкарнинг эгалари ҳозирча сотишга шошилмаяпти, чунки вақт ўтган сари баҳоси ошишини яхши билишади.

Тиш шифокорининг машинаси Ferrari F12berlinetta агрегат базасида қурилган бўлиб, оригинал кузовга эга, аммо Ferrari 275 GTBга ўхшаб кетади.

Суперкарга 6,3 литрли 700 от кучидан ортиқ қувватга эга мотор ўрнатилганлигидан бошқа техник кўрсаткичлари айтилгани йўқ. Машина нархи олти хонали сон билан ифодаланиши тайин, аммо аниқ айтилмади. Ҳечқиси йўқ, тиш шифокорлари, одатда, камбағал киши бўлмайди, чунки ҳамманинг 32тадан тиши бор 🙂