Энг ёқимсиз 10 суперкар

 Ойда ҳам доғ бор, деб тасалли берамиз. Аммо бу автомобиллар номига “супер-“ қўшимчаси бекорга қўшилибдими? Ҳа, бекорга қўшилибди, десак бўлади. Акс ҳолда Американинг Car and Driver нашри тузган энг ёмон ўн суперкар рўйхатидан ўрин олмасди.

Диққат, “кетмони учмаган” ўн суперкар билан таништиришни бошлаймиз.

1. Audi Quattro

1983−1984 йилларда ишлаб чиқарилган

Суперкар ишлаб чиқариш бўйича Audi тажрибага эга эмас эди. Темирни қизиғида босиб, пойгабоп машина ясагиси келди. Quattroга кучли турболашган беш цилиндрли мотор ва тўла узатмалар тизими ўрнатилди. Кичик купе олти сониядаёқ юз тезликка чиқарди. Аммо ундан 224 нусха тайёрланган холос, чунки ғилдираклар базаси 2,5 метрлиги ва двигатели жуда оғирлиги сабаб бурилиш масаласида оқсарди. Бу эса харидорга сира ёқмаган.

2. Ferrari 612 Scaglietti

2004−2011 йилларда ишлаб чиқарилган

612 “Феррари”нинг камёб русумларидан биридир. Салонига тўрт одам сиғишини айтмаганда бошқа афзаллиги йўқ ҳисоб. Кенг-мўл алюминий кузовининг узунлиги 4,9 ва кенглиги 1,9 м. Машина вазни 2 тонна. Оғир ва кенг суперкарни кўркам дизайни ҳам қутқара олмади, машина жуда бесўнақай эди.

3. Gumpert Apollo

2005−2013 йилларда ишлаб чиқарилган

2004 йилда Роланд Гумперт орзуидаги автомобилни ясаш учун ўз компаниясини ташкил қилди. Суперкарга “Ауди”нинг 4,2 литрли V8 мотори ўрнатилди. Икки турбадамлаш технологияли мотор уч сонияга қолмай юз тезликка чиқарди. Gumpert Apollo Нюрбургринг трассасида ўзига хос рекорд ўрнатди. Ақл бовар қилмас динамикасига қарамасдан йиғиш сифати паст, кузов панеллари ораси очилиб қолганди. Суперкар камида 550 минг доллар туришини эшитган харидорлар бурнини жийирди ва Роланд Гумперт жаноблари касодга учради.

4. Jaguar XJ220

1992−1994 йилларда ишлаб чиқарилган

XJ220 концептининг дебюти 1988 йилда бўлган. Прототип тўла узатмали трансмиссияси ва V12 двигатели билан ғурурланар эди. Аммо тўрт йилдан сўнг “ягуар”чилар бўлғуси харидорларнинг ҳафсаласини пир қилиб турболашган V6 ва орқа узатма билан ишлаб чиқарди. Дастлабки прототипга ошиқ бўлиб олдиндан тўлов қилган мижозлар шартномани бузди. Шундай қилиб суперкар ўзини оқламади.

5. Lamborghini Egoista

2013 йилда ишлаб чиқарилган

Биттагина ясалган бўлса ҳам ушбу рўйхатдан ўрин олишга арзийди. Egoista “Ламборгини” компаниясиниг 50 йиллик тўйига бағишлаб ясалган. Фазовий шаттллар каби қиёфаси кишини маҳлиё қилади, аммо қирралари ва вентиляцион тешиклари кўп.

6. Mercedes-Benz SLR McLaren

2003−2010 йилларда ишлаб чиқарилган

Тажрибали автомобилсоз компания билан “Формула-1” жамоаси ҳамкорлигининг меваси зўр бўладими? Албатта, дейишга шошилманг. Умид оқланмади, SLR McLaren жуда қўпол ва узун тумшуқли чиқди. Ҳатто дизайнерлар раҳбари хушламай қолди. Шундай қилиб ҳамкорликнинг мевасини бозор суймади. Натижада улар алоҳида суперкар тайёрлашга киришди: бири McLaren MP4−12C ва иккинчиси Mercedes-Benz SLS AMG.

7. Mosler Consulier GTP

1985−1993 йилларда ишлаб чиқарилган

Кузови шишатоладан ишланган Consulier GTPга Chryslerнинг тўрт цилиндрли 2,2 литрли мотори ўрнатилган, аммо машина тароват деган нарсадан бебаҳра эди. Дизайнерлар унга ҳусн ато этишга кўп уринди, иш чиқмагач, барча қўлини силтади.

8. Panther 6

1977−1978 йилларда ишлаб чиқарилган

“Бировга ўхшагим келмайди” деб даъво қилган олти ғилдиракли, томи тахланувчи суперкарга “Кадиллак”нинг 8,2 литрли V8 мотори ўрнатилган, автоматик трансмиссияга эга. Аудиотизим, телевизор ва телефон ўша йиллари камдан-кам машинага ўрнатиларди. Негадир атиги икки нусха ишлаб чиқарилган. Бири оқ ва бири қора. Улар ҳозир ҳам ҳаракатланади.

9. Qvale Mangusta

2000−2002 йилларда ишлаб чиқарилган

Дастлаб De Tomaso Bigua номини олган италян суперкарига “Форд Мустанг”нинг 4,8 литрли V8 двигатели ҳамда пластик кузов ўрнатилган. Ўзига хос дизайни ва томининг тахланувчи механизми пухта ишланганига қарамасдан Mangusta харидорларнинг меҳрини қозона олмади. Кўп ўтмай барча ҳуқуқларни Британиянинг ночоргина MG Rover концернига сотиб юборди.

10. Vector W2

1980 йилда ишлаб чиқарилган

Star Trek сериалидаги фазовий кемадан илҳомланиб ясалган футуристик прототип соатига 389 км тезликда ҳаракатланади, деб ваъда беришди. 1980 йилда бу кўрсаткич фантастика эди, аммо ҳақиқийлиги текшириб кўрилмаган. Машинага ўрнатилган Chevroletнинг 5,7 литрли V8 мотори олти юз от кучига эга. Суперкар интерьери ҳам фазовий тарзда жиҳозланган бўлиб, қаёққа қараманг индикатор демагани босиб кетган: ёнилғи тизимидаги босимдан тортиб узатмалар қутисидаги мой босимигача кўрсатиб туради. Аммо компания инвесторлари билан узоқ судлашувлар туфайли биттагина W2 ясалди.

popmech.ru сайти асосида тайёрланди