BMW келажакдаги автомобиль ички кўринишини намойиш этди

BMW компанияси Лас-Вегасдаги CES истеъмолчилик электроникаси кўргазмасида i Inside Future концептини тақдим этди. У келажакдаги автомобилларнинг ички кўринишини томоша қилиш имконини беради. Қурилма голографик дисплейга эга бўлган HoloActive Touch мультимедия тизими билан жиҳозланди, дея ёзади Kun.uz.

Ишлаб чиқарувчиларнинг таъкидлашича, виртуал экран ўз ичига проекцион дисплей имкониятлари, имо-ишоралар билан бошқариш технологияси ҳамда “ички сезгирлик” тачскринини қамраб олади. Тасвир марказий консоль устида пайдо бўлиб, тизим сенсорли дисплейга тегувчи бармоқлар хатти-ҳаракатини фарқлайди. Шу тариқа, мультимедия мажмуасининг барча функцияларини бошқариш мумкин.

i Inside Future’нинг тўрт ўринлик салонида тугмалар йўқ. Шу билан бир қаторда, ўнг томондаги панелнинг тагида китобларни сақлаш учун жой ажратилган.

Шунингдек, компания CES кўргазмасида Connected Window мультимедия тизимини ҳам намойиш этди. У ойналарни эслатувчи учта монитордан иборат.

Бошқарув имо-ишоралар ва овоз ёрдамида амалга оширилади, функционал тизим эса инсоннинг ҳар кунлик вазифаларига мослаштирилган. Connected Window рақамли органайзер бўлиб хизмат қилади ҳамда вақтни турли омилларни ҳисобга олган ҳолда тўғри тақсимлашга ёрдам беради.

Тахминларга кўра, тизимда смартфон ва шахсий компьютердаги маълумотларни ҳам сақлаш мумкин.