Британия бозорида энг серхаридор автомобиль қайси?

Экспертлар 2016 йилда Буюк Британия автобозорида сотилган машиналарни ҳисоблаб чиқди ва қайси автомобилларнинг харидори кўплигини аниқлади.

Қўшма Қиролликда ўтган йили сотилган автомобилларнинг умумий сони 3068000тани ташкил этди. Британия автомобиль савдоси ҳажми бўйича дунёдаги олтинчи ўринда. Энг харидоргир брендлар Ford, Opel ва Volkswagenлигича қолгани маълум бўлди.

Рўйхатда Ford Fiesta русуми етакчи. Ўтган йилда 120525 дона “Фиеста” сотилган. Бу бир йил олдингидан 9,7 фоизга кам натижадир. “Энг машҳур”ларнинг иккинчиси Vauxhall Corsa бўлиб, у МДҲ давлатларида Opel Corsa номи билан танилган. Уни 77110 харидор олган (-15,2 фоиз).

“Форд”га қарашли яна бир русум Ford Focus рейтингнинг учинчи поғонасида. 70542та “Фокус” харидорини топган. Шунингдек, экспертлар янги Vauxhall/Opel Astra автомобилига талаб ортганини қайд этди.