“Йилнинг энг яхши автомобили” совринига номзодлар аниқланди

Нуфузли World Car of the Year мукофотига бу йилги номзодларнинг деярли барчаси Европа маркаларидир.

Танлов ғолибини ўнлаб мамлакатдан келган 75 нафар журналист аниқлайди, деб ёзмоқда AutoExpress. Танлов ғолиби 13 апрел куни Нью-Йорк автосалонида эълон қилинади.

Шундай қилиб, 2017 йилнинг энг яхши автомобили деган номга даъвогарлар: Audi A5/S5 Coupe, Audi Q2, Audi Q5, Fiat/Abarth 124 Spider, Honda Civic, Jaguar F-Pace, Mazda CX-9, Skoda Kodiaq, Toyota C-HR ва Volkswagen Tiguan.

Беш йўналиш бўйича мукофотлар топширилади: “Энг яхши шаҳар автомобили”, “Энг яхши премиал автомобиль”, “Энг яхши яшил автомобиль”, “Йилнинг энг яхши дизайни” ва “Энг яхши спорт автомобили”.

AutoExpress ёзишича, бу йили Буюк Британия брендлари ўзини яхши кўрсатди. Буни финалга йўл олган русумлар орасида Британия машиналари сони Германия ва Японияникидан кейинги учинчи ўринда турганидан билиб олиш мумкин. Журналистлар фикрича, энг яхши спорт автомобили номига даъвогарлар (Aston Martin DB11, McLaren 570S, Audi R8 Spyder, Porsche 718 Boxster, Honda NSX) ўртасида беллашув қизғин кечади.

Эслатиб ўтамиз: ўтган йили Mazda MX-5 родстери йилнинг энг яхши автомобили деб топилган. Бундан ташқари, энг яхши дизайн ҳам родстерга тегишли. Toyota Mirai энг яхши “яшил” автомобиль, Audi R8 энг яхши спорт автомобили, BMW 7 эса энг яхши премиал автомобиль мукофотига сазовор бўлган.