BMW 3D-принтерда чоп этилган деталлардан фойдаланади

Немисларнинг BMW автоконцерни Американинг металл деталларни 3D-принтерда босиб чиқарадиган Desktop Metal стартапидан фойдаланиши ҳақида эълон қилди.

BMW хабарида 3D босма технологияси, биринчи навбатда, янги деталлар прототипини ясашга йўналтирилиши кўрсатиб ўтилган. Серияли ишлаб чиқариш ҳақида гап боргани йўқ. Янгича технология тажрибавий намуналарни тайёрлаш таннархини ва ишлаш вақтини камайтиришига компания ишонади.

BMW 3D-технологияга қизиқиш билдирган биринчи автокорхона эмас. Масалан, 2015 йилнинг кузида Франкфуртда Peugeot компанияси намойиш қилган Fractal концепти интерьерининг 80 фоизи 3D-принтерда тайёрланган. 2016 йил октябрида Honda деталлари 3D-принтерда босиб чиқарилган ихчам электромобилни кўрсатган.

Принтерда чоп этилган деталли автомобилни серияли ишлаб чиқариш режасини биринчилардан бўлиб Американинг Local Motors компанияси билдирган. 2014 йилдаёқ компаниянинг мутахассислари деярли тўлалигича босиб чиқарилган Strati автомобилини кўрсатган. “Страти”нинг шассиси, кузови, асбоблар панели ва марказий консоли принтерда босилган. Аккумулятори, двигатели ва осмаси Renault Twizy электрокаридан олинган.