“Феррари”да юк ташиймиз

Сиз суперкар номининг қарийб синонимига айланган “Феррари” русумида юк ташиш мумкинлигини ўйлаб кўрганмисиз? Қаршингиздаги юк ортиладиган қип-қизил автомобиль номи Ferrari FR270 бўлиб, у прототип ёки концепт эмас, серияли ишлаб чиқарилиши айтилган машинадир.

Belotti Handling SpA италян компанияси 1947 йилда ташкил топган. У ишни мобиль кранлар ишлаб чиқаришдан бошлаган ва ҳозиргача чиқаради, фақат бошқа бренд остида. Энцо Феррарининг бу компанияга алоқаси йўқлигини айтиб ўтишимиз керак.

1973 йилда компания эгаси алмашгандан сўнг Ferrari Belotti SpA номини олди. Бу даврда у бандаргоҳ контейнерларини ташиш учун кран ишлаб чиқариш бўйича дунёнинг етакчи компаниялари қаторига кирганди.

Ҳозир крансоз компания номи CVS Ferrari SrL, 2004 йилда эгаси яна ўзгарган. Крандан ташқари юкортгич, қувурётқизгич ва контейнерларни олиб-қўювчи турли машиналар ишлаб чиқаради. Яқинда тайёрланган юк автомобилига қўйилган ном эса, донғи кетган суперкар билан уни адашга айлантирди.

Компания юк ортиладиган машиналарнинг икки бўғинини ишлаб чиқаради — S Ferrari RORO FR270 ва CVS Ferrari Yard FYT230. ушбу бандаргоҳ машиналари ярим тиркамаларни ёпиқ ҳудудда судрайди. Ранги нега қизил? Афтидан, спорткарга ишора 🙂