Фотогалерея: Аэропорт учун мўлжалланган ўт ўчириш машиналари

Статистикага кўра, самолётлар дунёдаги энг хавфсиз транспорт воситаси ҳисобланади. Аммо баъзида шундай вазиятлар юзага келадики, унда фақатгина ўт ўчириш машиналар ёрдам бера олади. Daryo.uz ана шундай машиналар ҳақида маълумот берди.

Marmon-Herrington Ford V8 Crash Tender

Биринчи аэродром автомобили қачон ва ким томонидан яратилгани ҳақида афсуски маълумот йўқ. Бироқ 1941 йилда Буюк Британия ҳарбий-ҳаво кучларининг аэродромида Marmon-Herrington ўт ўчирувчи машинаси хизмат қилгани тарихда ёзилган.

Opel Blitz 3.6-6700A TLF-15/43

1943 йилда Люфтваффе ҳарбий учиш-қўниш йўлаги хавфсизлигини ТLF-15/43 цистернали Opel Blitz таъминлаган. Кўринишдан машина оддий ўт ўчириш автомобилларидан деярли фарқ қилмайди. Opel Blitz оқ ранги ва кўпик ишлаб чиқарувчи карбонат ангидридли баллонлари билан ажралиб турган.

«ПМЗ-15»

Собиқ Иттифоқда аэродромлар учун махсус автомобиллар Иккинчи жаҳон урушидан кейин пайдо бўлган. Биринчи «қалдирғоч» «ЗиС-151» шассисидаги «ПМЗ-15» бўлган.

АА-60 (7310)-160.01

«Аэродром автомобили» номини олган машина анча муваффақиятлироқ бўлган. АА-60 модели МАЗ-73101 шассиси асосида ишланган ва 1978 йили ишлаб чиқарилган. Пуркагич сувни 40 метр, лафетни 70 метр масофагача отиш имконига эга бўлган.

Carmichael Commando VRG161T

1972 йилдан 1991 йилгача Буюк Британияда ишлаб чиқарилган олти ғилдиракли Range Rover ҳалокат оқибатида жароҳатланганларни ташиш учун мўлжалланган.

Oshkosh Striker 3000

Striker АҚШнинг ўт ўчириш машиналари янги авлодининг вакили. Автомобиль тўрт, олти ва саккиз ғилдиракли вариантларда ишлаб чиқарилади. Oshkosh бир дақиқада 10 000 литр сувни пуркайди. Автомобиль кўпик тайёрлайдиган электрон тизим билан ҳам жиҳозланган.

E-ONE Titan

«Титан» оддий, ишончли ва тезкор бўлгани учун кўплаб мамлакат аэропортларида хизмат қилади. Турли қопламали йўлларда ҳаракатлана оладиган машина 12 минг литрга тенг иккита бакни ўзида кўтариб юради. Шунингдек, ўт ўчириш автомобиль 1533 литр кўпик ишлаб чиқаради. Cummins QSX двигатели 665 от кучига эга.

Rosenbauer Simba 8×8 HRET

Австриянинг Rosenbauer ўт ўчириш машинаси бутун дунёда машҳур саналади, бироқ Европа аэропортларида кўпроқ учрайди. Машина «елкасида» 12,5 минг литр сув ва 750 литр кўпикни олиб юради. Махсус автомобиль соатига 80 километргача тезликни 21 сонияда олади. Максимал тезлик соатига 140 километр, двигатель 1 250 от кучига эга.

Ziegler Z8 FLF

Германиядаги энг машҳур ўт ўчириш машина – Ziegler «қариндоши» MAN шассиси асосида ишланган. Бақувват автомобиль 12 цилиндрли 1 000 от кучига тенг турбодизел двигатели билан жиҳозланган. Зиэглер 15 тонна сув ва 1,5 минг литр кўпик ташишга қодир.

АА-9,0-(60-70)-50/3

КамАЗ-65222 шассиси асосида ишланган АА-9,0-(60-70)-50/3 Россияда ишлаб чиқарилган. Машина иккита лафетли пуркагич, сув иситадиган бак ва кўпик ишлаб чиқарувчи тизимга эга. Сув бакининг ҳажми 8,4 минг литр, кўпикнини – 600 литр.