Женева моторшоусининг бойлар учун мўлжалланган беш автомобили

Бундай автомобилларнинг нархи олти рақамдан иборат, саноқли нусхада тайёрланади ҳамда бой акаларнинг уйига йўл олади. Бироқ унгача Женеванинг қимматбаҳо автомобилларининг таърифини келтиришга улгурамиз.

1. Ferrari 812 Superfast

Етмиш ёшга тўлгани муносабати билан Ferrari тўёна автомобиль тайёрлади. Машинанинг номи камтарликдан анча узоқ — 812 Superfast, аммо машина дегани кўрса кўргудек. Узун капотни кўтарсангиз 6,5 литрли V12 моторга кўзингиз тушади. Моторда саккиз юз отнинг кучи бор. “Суперфаст” 2,9 сонияда юз, олти сонияда икки юз тезликка чиқади.

Энг юқори тезлиги 340 км/соат. Албатта, ҳавода ўқдек учишига аэродинамик элементлари ҳам сабабчи. Қимматлигига яраша фойдали жиҳатлари кўп. Орқа ўқи бурилади, рулига электркучайтиргич ўрнатилган бўлиб, у шошилинч ҳолатда ҳайдовчига маслаҳат бериши мумкин. Нархи айтилмади, аммо олти хонали сондан иборатлиги тайин.

2. Rolls-Royce Ghost Elegance

Янгиланган Rolls-Royce Ghost седани 2014 йилдан бери чиқарилмоқда ва қимматбаҳо автомобиль мухлисларининг ёқимтойига айланган. Аммо шу кунларда “Роллс-Ройс”нинг Женева автосалонидаги бурчагида Elegance пайдо бўлди. У шахсий коллекционер буюртмаси билан тайёрланган бўлиб, кузови олмос билан пардозлангандир.

Автомобилга “олмос чанги”ни сачратиш учун мингта олмос туйиб кукунга айлантирилди, шубҳасиз, бу иш қўлда бажарилган. Қимматбаҳо тошларни саралашга икки ой кетди, сўнг яна бир неча кун бўяш ва силлиқлашга сарфланди. Инлизлар бўёқнинг баҳосини ошкор этишмади ва камтарлик билан “марка тарихидаги энг қиммати”, деб қўя қолишди.

3. SCG003S

Бу тушунарсиз номнинг кенгайтмаси Scuderia Cameron Glickenhaus 003 Stradale. SCG003S номи ортида жудаям тезкор купе турибди. Унинг прототипи аввалроқ кўрсатилган, Женевага эса кам серияли версияси келтирилди.

Купенинг 4,4 литрли V8 двигатели бор. Саккиз юз от кучига эгалиги учун максимал 350 км/соат тезликка эриша олади. 250 км/соат тезликда кузов юқоридан 700 кг юк билан босади, шунинг учун бу тезликда бурилишдан асло қўрқмаса ҳам бўлади.

Компания SGC003S Нюрбургринг айланасини 6 ярим дақиқада айланиб чиқишига ишонади. Буни ҳам ўзига хос рекорд деса бўлади, аммо ҳали синаб кўрилмаган рекорд. Сиз буни синаб кўришингиз мумкин, фақат аввал 2 млн еврога SGC003S автомобилини сотиб олишингиз керак.

4. Pagani Huayra Roadster

Pagani Женевада узоқ кутилган Huayra суперкарини намойиш қилди, бу жаҳондаги энг мукаммал суперкарларнинг биридир. Оддий томсиз Huayra эмас, машина йўқдан бино қилинган. Huayra Roadster карбонпластик ва алюминийдан енгил ва пишиқ қилиб ишланган.

Дабдабали ўриндиқлари ортига 764 от кучига эга двигатель ўрнатилган. Pagani суперкардан юзтагина ясаб, 2,3 млн евродан сотади. Сотади, дейиш ноўрин, чунки аллақачон сотилиб бўлди. Қизиққанлар уни фақат кимошди савдосидан қидириши мумкин.

5. Mercedes-Maybach G 650 Landaulet

Люкс бўлиш учун минг от кучига эга бўлиш ёки олмос қоплаттириш шарт эмас, деб ҳисоблайди “Мерседес”чилар. Mercedes-Maybach бисотидан Женевага G 650 Landaulet йўлтанламаси келган. Йўлтанламаснинг ғилдираклар базаси катталаштирилган, туби ердан ярим метр баланд.

630 от кучига эга йўлтанламаснинг баҳоси ошкор этилгани йўқ, аммо 350-400 минг евро атрофида бўлиши мумкин. Ҳаммаси бўлиб 99 нусха тайёрланади, шунинг учун олгиси келганлар шошилиши лозим.