NIO стартапи автопилотли электромобилни намойиш қилди (видео)

Хитойнинг NIO стартапи автопилот ўрнатилган электромобиль концептини кўрсатди, деб хабар қилмоқда The Verge. Русумга EVE номи берилган. У шаҳар ичида мунтазам узоқ масофага қатнаш учун мўлжалланган. Концептда йўловчилар учун кўнгил очиш ва қулайликка урғу берилган. Электромобилда дисплейли интерфаол ойналар тизими мавжуд. Шаффоф панорамали томи бор.

NIOнинг ижрочи директори Падмашри Уорриор концептга “одамларни ташувчи мобиль тураржой” деб таъриф берди. Электромобилга сунъий интеллектли NOMI борт ёрдамчиси ўрнатилади. Автопилот вазифасини унинг ўзи бажаради. NIO айтишича, машинани ўн дақиқада зарядлаб,  320 км йўл юриш мумкин. Тўла циклида эса минг кмча йўл босса бўлади. “Тураржойли” электромобиль 2020 йилда бозорга чиқади.

Аввалги номи NextEV бўлган компанияда Uber, Ford ва Lyftнинг собиқ ходимлари фаолият юритмоқда. Ўтган йили стартап 1360 от кучига эга бўлган EP9 электромобилини тақдим этган. Кейинроқ эса “Тесла” билан рақобатлашувчи электрли кроссовер тайёрлаш ниятини билдирган.