Голландиядан “Жангчи” чиқади

Нидерландиянинг Spyker компаниясининг режалари Бекобод шамолининг йўналишидан ҳам тезроқ ўзгариб туради. Женева автосалонида кўрсатилган С8 Preliator Spyder родстери яна компания концепциясининг тубдан ўзгарганлигига мисолдир.

Кам серияли Spyker суперкарлари доимо ўзига хос дизайни билан ажралиб турган. Аммо двигатели немисларники. Охирги русумларда Audiнинг 4,2 литрли V8 двигатели ва бошқа агрегатлар қўлланган.

Бироқ голланд автомобилсозларини бу қониқтирмаган кўринади. Улар Женевада “Спайкер”лар бундан буён шведларнинг Koenigsegg компаниясининг моторлари билан жиҳозланишини эълон қилди. Шведча мотор беш литр ҳажмли бўлиб, олти юз от кучига эгадир. Қизиғи шундаки, у фақатгина механик узатмалар қутиси билан ишлайди.

“Спайкер” юз тезликка чиқиши учун атиги 3,6 сония керак. Энг юқори тезлиги 322 км/соат. Вазнини камайтириш учун кўп миқдорда алюминийдан фойдаланилганини голландлар таъкидламоқда. Аммо интерьери оддий ишланган.

Preliator (лотинчада “жангчи”) атиги юз нусха тайёрланади. Баҳоси 403500 евро бўлиб, бу Европа даражасида ҳам каттагина нархдир.