Мана буни рул деса бўлади

Тараққиёт ўрганиб қолган нарсаларимизни биздан олиб қўяди. Масалан, бугунги телефонларнинг босадиган тугмаси йўқ, компютерларнинг эса дисководи йўқолиб кетмоқда. Эҳтимол, орадан 10 йил ўтиб машина рули ҳам йўқолиб кетар. Худди табиий эволюция жараёни каби.

Келажак машинаси қай тарзда бурилиши ҳақида ўйлашни кейинга қолдирамиз ва эътиборингизга энг антиқа рулларни ҳавола қиламиз. Улар, ҳатто, чамбаракка ўхшамайди, бири велосипед рули каби бўлса, иккинчиси штурвалнинг ўзи.

Chevrolet Corvair Testudo

Оддийроғидан бошлаймиз. Эллипс шаклидалигини айтмаса “Шевроле”нинг рулида ғайритабиийлик йўқ. Аммо бу рул 1963 йилда тайёрланганини эсдан чиқарманг. Женева автосалонига эллипс рулли машина ўзи юриб келган.

BMW Z22

BMW Z22 концепт-карининг тўртбурчак рули ўз шакли билангина эмас, кўп сонли функциялари билан кишини лол қолдиради. Рул ёрдамида орқани кўрсатувчи камеранинг миқёсини созлаш мумкин. Қизиғи шундаки, серфункция руль чамбараги ва ғилдираклар бир-бирига боғлиқ эмас. Барчаси drive-by-wire тизимининг зиммасида. Концепт-кар 2005 йилда намойиш этилган.

Mazda MX-03

Шиддатли МХ-03 концепт-кари 300 км/соат тезликка қийналмасдан чиқади. Машинанинг қудратига мувофиқ келиши учун Mazda дизайнерлари кабинани қирувчи самолётники каби ишлади, ҳаттоки, руль олиб ташланиб штурвал ўрнатилди.

Honda EV-Ster

“Хонда”нинг EV-Ster концептининг рулини чанғичи ишлаганга ўхшайди. Рул, аниқроғи, штурвал тик ҳолатда ўрнашган.

Ford La Galaxie

EV-Ster услубидаги рулни 1958 йилда тасаввур қилиш янада ваҳимали. “Хонда” концептидаги каби “Форд”да ҳам штурвал.

Buick Wildcat

Buick рулига “барчаси кафтдагидек намоён” иборасини қўллаш мумкин. Асбоблар панели, двигателни ишга тушириш ва ўчириш, бурилиш кўрсаткичлари ҳамма-ҳаммаси рулнинг ўзида ўрнатилган. Рул гупчаги эмас, фақат чамбарак айланади. Wildcat ўз даврининг энг қизиқарли концепт-кари эди. Ғалати рули билан бирга 360 от кучига эга 3,8 литрли атмосферали мотори бўлган. Моторни Buick ва McLaren биргаликда тайёрлаган. Бу 1985 йилларга тўғри келади.

Maserati Boomerang

Buickникига ўхшаш рулни аввалроқ, яъни 1972 йилда “Масерати Бумеранг” Italdesign студияси билан ясаган бўлиб, унинг фарқи рул марказида ҳамда тугма ва ускуналаридадир. Ҳайдовчи пойгачиларга ўхшаб ярим ётган ҳолда жойлашади. Техник жиҳатдан машина Maserati Boraга ўхшаш бўлган.

Lancia Stratos Sibilo

Машинанинг асбоблар панели паст шифт остида жойлашган, марказдаги ғалати шаклли руль эса кафт учун қулай бўлиши кўзда тутилган. 2011 йилда ноёб Sibilo “Сотбис” кимошди уйида 98500 еврога сотилган.

Citroen Karin

Citroen компанияси ҳамиша ноодатий рулларга ўч бўлган. Бунинг учун DS русумини ёки гупчаги қўзғалмас С4ни эслаш кифоя. Аммо мақоламизда учтагина концептни эслаймиз холос. Биринчиси эҳромсимон Karin купеси. Унинг рулида назорат лампалари, борт компютери билан бирга асбоблар панели ҳам жойлашган.

Citroen C-Airplay

Karinнинг авлодларидан бири C-Airplay саналади. Иккаласининг фарқи катта эмас, бирида рақамли панел бўлса иккинчисида аналогли. Рулда узатмаларни улаш қулоқчаси пайдо бўлган. Дарвоқе, хавфсизлик ёстиқчалари ҳам бағрикенг рулга сиғиб кетган.

Citroen Osmose

Мақоламизда рулнинг ўрнини босувчи жойстиклар ва рулсиз машиналарга тўхталиб ўтирмадик, аммо Osmose концептининг сенсор рулини қолдириб кетсак бўлмайди. Унда навигацион тизим маълумотлари, машинанинг асосий кўрсаткичлари, ҳаттоки, СМСлар акс этади. Сенсорнинг совуққа бардошлилиги ҳақида гап-сўз йўқ, концепт барибир концепт-да.

Lamborghini Athon

Ҳавода “муаллақ” турган чамбарак расмини кўриб бошингиз қотдими? Аслида кегайи бор, аммо биттагина, чап томонга синчиклаб қаранг. Бурилишда торпедонинг қисми бўлган кегай ҳам бурилади.

Lancia Orca

Personal компанияси Orca концепт-кари учун тайёрлаган рульнинг ўртаси баайни калкулятор, юқори қисми синтезатор дисплейининг ўзи. Бундай руль замонавий болидларга жуда мос. Технологик ва ажабтовур. Айниқса, 1982 йил учун.

Lancia Medusa

Lanciaнинг кўп функцияли рули фақат Orca русумидагина эмас, “Медуза” ундан қолишмайди. Йирик-йирик тугмалар ва электрон соатларни бизга таниш Italdesign студияси тайёрлаган.

Oldsmobile Inсas

Бу спортчиларнинг тренажёри эмас, Oldsmobileнинг рулидир. Сиз беш ўринли хэтчбекнинг салонини кўриб турибсиз. 230 от кучига эга бўлган бу хэтчбекнинг салонида мақоламизни якунлаймиз.