Кореяда энг ҳашаматли седан намойиш этилди

Сеул автосалонида Genesis люкс бренди Genesis G90 Special Edition шоҳона седанини намойиш қилди.

Genesis бу Hyundai концернининг люкс машиналар ишлаб чиқаришга ихтисослашган бўлинмасидир. У тобора дунё бозорига чиқиб, BMW ва Mercedesга бўйлашмоқда. Янги марканинг вакиллари Genesis G90 Special Edition “унумдорлик, дизайн ва инновациянинг олий стандарти”га тўғри келишини таъкидламоқда. Кореянинг замонавий технологияларни ўзида энг кўп жамлаган ва энг ҳашаматли автомобили ҳам бугун Genesis G90 саналади.

Кореяда Genesis EQ900 номи билан сотиладиган оддий автомобилдан Genesis G90 икки хил рангли кузови, тўқ рангли ғилдирак дисклари ва салонининг пардози билан ажралиб туради. Салонга ёғоч ва чарм билан ишлов берилган, юнг гиламча тўшалган. Расмдагидек оқ-кўк, ундан ташқари, жигарранг-кулранг ва кулранг-кумушранг туслари мавжуд.

Автомобиль “ака”сидан қиммат туриши шубҳасиз, чунки унга алоҳида цехда ишлов берилади. Кузовининг юқори қисми конвейерда эмас, қўлда бўялади. Кореяда Genesis EQ900 уч хил мотор билан сотилади: 3,8 литрли V6 (315 о.к.), 3,3 литрли битурбо (370 о.к.) ва 5 литрли V8 (425 о.к.). Барига автоматик узатмалар қутиси ўрнатилган.

Бундан ташқари, корейслар 2019 йилда “Генезис”нинг гибрид ва тўла электрли модификацияси пайдо бўлишини хабар қилди.