“Феррари” 488 GTB купесининг экстремал версиясини тайёрламоқда

Италия автокомпанияси 488 GTBнинг тезкор турини ишлаб чиқараётгани хабар қилинмоқда. Бўлғуси спорткарнинг рақиблари Lamborghini Huracan Performante ва McLaren 720S бўлади. Бу иккаласи Франкфуртдаги IAA-2017 автокўргазмасида чиқиш қилади.

Аммо пойга йўлаги бўйлаб ҳаракатланувчи италян русуми ҳақида батафсил хабар берилгани йўқ.

Тахминларга кўра, оддий версиясига қараганда янги комплектацияси енгилроқ бўлади, двигатели кучайтирилади. Car and Driver порталининг башоратига ишонадиган бўлсак, купе турбодамлаш технологиясига эга бўлади, 3,9 литрли V8 двигатель ўрнатилади, унинг қуввати етти юз от кучига тенг.

Чекланган нусхада ишлаб чиқарилиши эҳтимолга яқин. Спорткарнинг дебюти кузга яқин ўтказилиши мумкин. Шунингдек, Франкфуртдаги Халқаро автосалонда учратишимизни ҳам истисно қилиб бўлмайди.