Apple автомобилсозликда ҳам омадини синаб кўрмоқда

Apple ҳайдовчисиз автомобил яратиш орзусидаги «Titan» лойиҳасидан 2016 йилда воз кечган бўлса ҳам, шу кунларда америкалик IT-гигант Германиянинг Bosch компанияси билан мустақил автомобил технологиясини яратишда ҳамкорлик қилаётгани ҳақида хабарлар юрибди.

Apple мазкур ҳамкорликка изоҳ бермаган бўлса-да, Bosch вакили бу маълумотни тасдиқлаган. Тахминларга кўра, немислар «Олма» корпорацияси билан автомобилсозлик учун зарур сенсор ва электрон назорат қурилмаларини, электрон тормоз тизимлари ва бошқа технологик бутловчи қисмларни яратишга киришишган кўринишади.

Apple, шунингдек транспорт соҳасини автоматлаштиришга йирик сармоя сарф қилаётганини маълум қилган. Корпорация келажакда ақлли машиналар учун сенсорлар ва дастурий таъминот маҳсулотлари ишлаб чиқарувчи етакчи таъминотчига айланишни режа қилган бўлиши ҳам мумкин. Компаниянинг CarPlay, яъни автомобил бошқараётган вақтда қўл телефонларидан хавфсиз фойдаланишни таъминлайдиган, iOS технологияси ва 100 дан ошиқ моделдаги автомобилларнинг тизимини боғлайдиган тизим аллақачон замонавий автомобилсозлик саноатида тан олинган ва татбиқ қилинмоқда.