Қоидабузарликларни онлайн билиш мумкин бўлган видеоролик тайёрланди

Май ойидан ишга туширилиши режалаштирилаётган мазкур хизмат ҳақида Электрон ҳукумат марказининг Ахборот-ресурсларини ривожлантириш департаменти бошлиғи Азиз Азимов дастлабки маълумотларни берди.

Азимов “Qalampir.uz” сайти учун мазкур жараён қай тартибда амалга оширилиши тасвирланган видеони ҳам тақдим этди.

Жарима ҳақидаги маълумот қандай олинади?

Ҳайдовчилар Ягона интерактив давлат хизматлари порталидаги шахсий кабинетларига кириб, автомобилнинг техник гувоҳномаси рақами ва автомобилнинг давлат рақамини киритиш орқали, қоидабузарлик қайд этилгани, унинг миқдорини билишлари мумкин.

Агар чорраҳага ўрнатилган камералар қоидабузарликни қайд этса, тўғридан-тўғри Ягона интерактив давлат хизматлари (my.gov.uz) порталидаги фойдаланувчининг шахсий кабинетига маълумот юборилади.

Бундан ташқари, автомобиль эгаси шахсий кабинетига қўл телефони рақамини киритиб, SMS-огоҳлантирув хизматини ёқтирган бўлса, жарима ҳақида хабар унинг қўл телефонига юборилади.