Tesla биринчи юк машинасини қачон кўрсатади?

Tesla компанияси етакчиси Элон Маск жорий йилнинг сентябрида илк юк автомобилини намойиш этишини Twitter микроблогида эълон қилди. “Жамоа ишни қойиллатиб бажарди. Биз янги даражага кўтарилдик”, дея қўшиб қўйди Маск.

“Твиттер”чиларнинг саволларига жавоб берар экан, Маск яқин 18-24 ой ичида дастлабки пикапини ҳам тақдим этиш режасини билдирди. Бундан ташқари Tesla йўлтанламас ишлаб чиқаришни режалаштирмоқда.

Tesla компаниясига 2003 йилда асос солинган бўлиб, унинг раҳбари тадбиркор Элон Маск бўлади. Маск, шунингдек, SpaceX ракета-космик фирмасига эгалик қилади. Мартнинг охирида Хитойнинг Tencent Holdings компанияси “Тесла”нинг 5 фоиз акциясини 1,8 млрд долларга сотиб олди.

“Тесла”чилар яқин-орада энг ҳамёнбоп электромобилни ишлаб чиқармоқчи. Model 3 шу йилнинг ўзида 35 минг доллар нарх билан сотувга чиқиши тахмин этилмоқда. Бу бошқа тесламобиллардан деярли икки баробар арзондир.

10 апрел куни биржадаги савдода “Тесла” капитализацияси бўйича General Motors компаниясидан ўзиб, АҚШнинг энг қиммат автокомпаниясига айланди.