Автомобиль компанияларидан суперсоатлар шодаси

Тўкисликнинг белгиси қимматбаҳо автомобилгина эмас, қимматбаҳо соат ҳамдир. Диққатингизга автомобиль компаниялари логотипи туширилган бешта энг қиммат соатни ҳавола этамиз.

McLaren ва Richard Mille

Richard Mille компаниясининг соатсозлари McLaren-Honda Формула-1 жамоасининг ҳамкори бўлади. Пойгачилар жамоасига бағишлаб алоҳида соатлар ишлаб чиқарилган. Улар жами 75 дона.

Соатлар титан, карбон ва графендан тайёрланган. Ҳар бирининг нархи 981 минг АҚШ доллари.

Breitling Mulliner Tourbillon ва Bentley Bentayga

Ушбу рўйхатимизга кирувчи соатлар тақиладиган бўлиши шарт эмас, жумладан Breitling соати ҳам шундай. Bentley Bentayga ўтган йили анчагина шов-шув кўтарди, хусусан, биринчи серияли йўлтанламасини чиқарди.

Breitling соати 234 360 долларга баҳоланади. Соат автомобиль иқлим назоратчисининг марказий ҳавоҳайдари устида туради. Қўлда тайёрланган, олтин ва саккизта бриллиант қадалган. Ҳаракатланиши мобайнида зарядланади.

Parmigiani Fleurier Super Sport

Қушдек елувчи автомобиллардан бири Bugatti Veyron Super Sport соатсозлар эътиборидан четда қолиши мумкин эмас. Қолаверса, Parmigiani Fleurierнинг Bugatti билан салом-алиги бор. Ғаройиб дизайнли соат 2011 йилда 30 нусхада тайёрланган.

Super Sport соат механизми бураб турилади. Олтиндан тайёрланган ва кўкиш ёқут ойна қопланган. Тасмаси тимсоҳ терисидан. Соатнинг ўзи осилиб турган ҳолатида Bugatti Veyron Super Sport автомобилига ўхшайди. Нархи 299 минг доллар.

Hublot MP-05 LaFerrari

MP-05 LaFerrari италян маркасининг фахрий русуми чиқарилиши муносабати билан ишланган. 50 нусхада чиқарилган ва қуввати 50 кунга етади.

Корпуси титан ёки сапфир ойнадан ишланган. Соат углерод толали қутида етказиб берилади. Чакана савдода нархи 345 минг доллар.

Parmigiani Fleurier Type 370

Ушбу қимматли соат ҳам Bugatti ва Parmigiani ҳамкорлиги маҳсулидир. Унинг турли вариантлари ишлатилган материалига қараб фарқланади. Энг қиммати Mythe вариантидир.

Mytheнинг цилиндрсимон корпуси пушти олтиндан ишланган ва Hermes чарм тасмаси тақилган. Устидаги симтўрини ясаган уста Bugatti Type 57нинг радиатори панжарасидан илҳомланган. Type 370нинг энг қиммати 370 минг доллар туради.

Cabestan Scuderia Ferrari One

Соатсозликда тенги йўқ швейцарияликлар “Феррари” соатини тайёрлаб берди. Cabestan компанияси Ferrari билан биргаликда ясаган қиммат соат пойга жамоасига бағишланади.

Соат тилладан эмас, Ferrari болидидан олинган материаллардан ясалган. Ҳа, унинг карбондан ясалган деворчаси бир замонлар трассада соатига 300 км тезликда елиб юрган. Баҳоси 393 800 доллар. Бунча пулингизга, соат оласизми ёки Ferrari?