Россиялик инженерлар буғдой ўриш комбайни учун автопилот ишлаб чиқди

Россиянинг Cognitive Technologies компанияси мутахассислари қишлоқ хўжалиги техникаси учун мўлжалланган автопилот тизими ва “компьютер кўз” тайёрлаш устида изланмоқда. Тўғри, уни тўла автопилот деб бўлмайди, аммо дастур рулни тутишни ва йўналишдан оғмай юришни уддалайди, дейди компаниянинг матбуот хизмати.

Нейрон тармоқлари тизими бутун йил давомида машина дуч келиши мумкин бўлган турли вазиятларни ўрганди. Бунинг учун инженерлар комбайн йўлиққан турли вазиятларни расм ва видеога олиб саралади. Натижада сунъий идрок қишлоқ хўжалиги экинларини бир-биридан ажратишни ўрганди, жўяк, марзаларни фарқлайдиган бўлди. Бундан ташқари бегона ўтларни ажрата олади. Хуллас, робот йиққан ҳосил қўлда йиғилганидан ёмон бўлмаслигини муаллифлар ваъда қилмоқда.

Тизим томорқа ҳолатини илғайди, ерга доир янги фарқларни унга тушунтириш мумкин. Бунинг учун дастурий таъминоти янгиланади. Сифатли ва равон ишлаш учун қандай ҳаракатланиш кераклигини сунъий идрокнинг ўзи ҳал этади.

Аммо ҳозир автопилот қиёмига етгани йўқ, шу боис ҳайдовчи иштирокида синалади. Тажрибалар давом этмоқда, якунига етганда комбайн тўла автоном тартибда ишлаши мумкин бўлади.

Ушбу технологияни яратишга 34 млн рубль ажратилган. Тўлақонли автоном комбайн 2024 йилда тақдим этилади.