Шанхай автосалонининг “ўхшамаган” ва антиқа автомобиллари

Хитойликлар фақат нусха кўчириш билан шуғулланмайди. Баъзида ўзлари ҳам зўр-зўр машиналар дизайнини яратишга уринади. Аммо кўпинча, келишмаган автомобиль яратиб қўяди. Қуйида санаб ўтилган авторусумларнинг ҳаммаси Шанхай автосалонининг топилдиқлари бўлиб, дизайнер бу билан мижозни кулдирмоқчими, чўчитмоқчими – билмайсан киши.

Хитойча зирҳли машина

BAIC концерни BJ80 русумини ишлаб чиқаришни ўрганганига кўп бўлмади. У “Мерседес Гелендваген”нинг қўполгина кўчирилган нусхасидир. Бироқ BAICчиларга бу кам кўринган чамаси, клон асосида оригинал зирҳли машина ясашга киришган. Аммо ҳимоя масаласига келганда… Аслида, ҳақиқий зирҳли машинанинг ўққа бардоши йиғилганларга намойиш этилади. Аммо хитойча “гелик”нинг видеолавҳасида тўқнашув тестининг видеоси кўрсатиб қўя қолинди.

Пойгабоп шатакчи

Кўриб турганингиз Lamborghini маҳсулоти эмас. “Трансформер” ҳам эмас. Бу Хитойнинг JMC фирмасининг концептуал шатакчисидир. Кўринишидир жуда тезкор.

Алвастидан ҳимояловчи машина

Leopaard (айнан иккита “А”) маркаси ясаган автомобиль ўрмонда ёввойи ҳайвонлар қуршовида қолишдан ҳимояланган бўлса керак. CT7 деб номланган пикапнинг ойналаригача панжара қопланган. Қоронғу ўрмонда алвасти ортингиздан қувганда машина ойнасини оча олмаслиги ҳам кўзда тутилган бўлса, эҳтимол. Ваҳимали пикапнинг эшикларида қандайдир зирҳга ўхшаш нарса қопланган. Хуллас, бадбин хаёлли мижозлар учун айни топилдиқ. Дарвоқе, ҳимоявий материаллари пластик ёки пенопластдан тайёрланганлиги эҳтимолини эслатиб қўймоқчимиз.

Ўтиринг, жангга борамиз

Кимки ўзини ҳақиқий жангчи сифатида ҳис этишни истаса, Warrior Motor компанияси ёрдам беради. Олти ғилдиракли Jeep Wrangler йўлтанламасларига ўтирингу, ўзингизни ёвқур жангчидек сезинг. Йўлтанламасларнинг дизайни жуда ғалати, аммо хитойликлар машинаси бошқалардан ажралиб туришни хуш кўради.

Электрли миттивой

Бу ҳам BAIC концернининг “боласи”. Компания электрокарлар бўғимини ривожлантириб уч метрли, икки ўриндиқли Arcfox электромобилини чиқармоқчи. Тўғри, бу концепт. Тўла заряди билан 200 км йўл босишини мумкинлиги айтилмоқда. Қолаверса, беш дақиқада зарядланаркан. Қирқ от кучига эга. Кузови алминий каркас ва пластик панеллардан ташкил топган.

Ёшларбоп кроссовер

Haima ёшлар учун компакт кроссовер тайёрлашни режалаштирган, аммо 4,2 метрли S5 Young келишмаган қиёфада яралган. Машина ялпоқ бурунли француз булдогига ўхшайди. Аммо 1,6 литрли моторининг қуввати 122 от кучига тенг “ялпоқбурун”нинг савдоси аллақачон бошланган.

Узун “Қизил байроқ”

FAW давлат концерни Hongqi автомобиллар оиласини анчадан бери ривожлантирмоқда. “Қизил байроқ” деб ном олган автомобиль Хитой бойваччалари учун мўлжалланган. 5,2 метрли узун йўлтанламас кўргазмадан кўргазмага ўтиб узоқ юрди, аммо серияли ишлаб чиқариш бошланганига кўп бўлмади. Саккиз поғонали автоматик қутиси бор, тўла узатмали вариантда ишлаб чиқарилади. Уч тоннали “қизил байроқ” 8,8 сонияда юз тезликка чиқади.

Ҳарбийча ниқобингдан

Dongfeng компанияси бир замонлар Warrior ҳарбий машинаси лойиҳаси билан шуғулланган. Уни Москвага олиб бориб белорусларга совға қилган ҳам эди. Энди “Донгфенг”чилар зирҳли машина тайёрлашни дилига тугди. Ҳарбийча ниқобдаги ваҳимали автомобилнинг савлати ўзига яраша. Аммо техник кўрсаткичлари ҳақида бирор гап айтилмади.

Шкафча-автомобиль

Хитойда товарини велосипед ёки мотороллерга ортиб юриб савдо қиладиган майда баққоллар жуда кўп. Дейлик, тоғда савдо қилишга тўғри келса, Taihangauto фирмасининг Т1 фургончасидан яхшисини тополмайсиз. Узунлиги 3 метрдан сал узун, конструкцияси соддагина. Аммо кўргазмага қўйилган автомобилнинг ён панеллари букланиб ётганидан сифати хароблигини билиш мумкин. Шунга қарамасдан, шамол ва ёмғирдан пана бор, кимлардир учун бўлаверади.

Занжирли йўлтанламас

Maxus компанияси аввал Британиянинг, сўнг Россиянинг ГАЗ гуруҳи ихтиёрида бўлган. Ҳозир Хитойнинг SAIC концернига тегишли ҳисобланади. Maxus бугун “Газел” типидаги кичик юк машиналаринигина эмас, йўлтанламаслар ҳам ишлаб чиқармоқда. Расмда занжирли D90 йўлтанламаси ва турбодизелли Т60 пикапини кўриб турибсиз.

Номидан “Хаммер” дейсиз

Humvee бренди армия йўлтанламасини қайта ишлаб чиқаришга бел боғлади. Унинг номи C-series бўлиб, мотори 430 от кучига эга. Ўзида классик “Хаммер”нинг кўпгина хусусиятларини жамлаган. Нега номи «Ҳамвей»? Қулоққа «Ҳаммер» эшитилиши учун 🙂