Пойтахтда энг кўп қоида бузган юридик шахслар эълон қилинди

Тошкент Ички ишлар бош бошқармаси 6−13 май кунлари давомида йўл ҳаракати қоидаларини энг кўп бузганлар рейтингини эълон қилди, деб ёзмоқда Sof.uz. Рўйхатнинг биринчи бешлигидан ўрин олган тўртта автомобиль пойтахтдаги корхоналарга, биттаси эса Тошкент ҳокимиятига тегишли экани маълум бўлди.

Рейтингда фото ва видео қайд этиш камералари 17 маротаба тасвирга олган Malibu (давлат рақами белгиси 01 216 WDA) биринчи бўлди. Бунда 16 маротаба белгиланган тезликдан ошиш қайд этилган бўлса, бир марта светофорнинг тақиқловчи ишорасига риоя қилинмаган. Автомобиль пойтахтнинг Чилонзор туманида рўйхатга олинган GOLD AIR TRAVEL корхонасига тегишли. Жариманинг умумий қиймати 8,087 млн сўмдан зиёдроқни ташкил этди.

Иккинчи ўринда — Lacetti (давлат рақами 01 305 YDA) BILOL MYAGKAYA KROVLYA МЧЖга тегишли.Мазкур автомобилни бошқарган шахс 13 марта ЙҲҚни бузган. 11 марта тезликни оширган бўлса, икки маротаба «қизил»дан ўтиб кетган. Жарима 2,8 млн сўмни ташкил этади.

Тошкент шаҳар ҳокимлигининг Маъмурий бинолардан фойдаланиш дирекциясига тегишли «Эпика» русумли автоулов (давлат рақами 01 206 ТВА) ҳайдовчиси 12 маротаба йўл ҳаракати қоидаларини бузди. У чорраҳаларда 7 марта «қизил»дан ўтган, 5 марта тезликни оширган. Мазкур қоидабузарликлар учун 2,8 млн сўмдан зиёд миқдорида жарима тўлайди.

Олмазор туманидаги Orange taxi МЧЖга қарашли Nexia (давлат рақами 01 270 ТТС) 11 марта камералар томонидан қайд этилган. Марта тезликни оширгани, 3 марта светофорнинг тақиқловчи сигналига риоя қилмагани учун 2,096 млн сўмдан зиёдроқ жарима тўланадиган бўлди.

Бешликни Сергели туманида рўйхатдан ўтган МЧЖ шаклидаги Global Building Machinery корхонасига тегишли Malibu (давлат рақами 01 077 VDA) якунлаб берди. Автомобиль тўққиз маротаба қоида бузилиши бўйича рўйхатга олинган. Саккиз марта тезликни оширганлик, бир марта «қизил»дан ўтганлик учун 2,69 млн сўмдан зиёдроқ жарима тўланиши белгиланди.