Volkswagen компанияси Tesla Model S рақобатчисини ишлаб чиқаради

Янги авлод Volkswagen Phaeton автомобиллари тўлиқ электрлаштирилади. Концерн вакилларининг қайд этишича, автомобиль ўзининг ёрқин дизайни ва илғор технологиялари билан ажралиб туради. Машиналар савдоси 2020 йилдан бошланиши лозим. Autocar хабарига кўра, Volkswagen янгилиги Tesla Model S билан рақобатга киришади.

Седан қувват ускунаси таркибига учта электромотор киради. Автомобилнинг умумий қуввати эса тахминан 429та от кучига тенг бўлади. Электромобиль қувватлантирилмасдан 250дан 500 километргача бўлган масофани босиб ўтади. Tesla Model S`нинг энг қиммат модификацияси эса битта заряд билан 425 километргача йўлни босиб ўта олади. Бу – айни пайтда барча электромобиллар ўртасидаги энг яхши кўрсаткичдир.

Янги авлод автомобилларининг стандарт намунасида олд ғилдираклар етакчи ҳисобланади, бироқ Phaeton ҳар икки томони ҳам “тортадиган” 4Motion технологияси билан таъминланади. Volkswagen Phaeton`нинг келгусидаги авлодининг ҳажми ҳам бир оз каттароқ бўлиб, тўлиқ алюминли кузовга эга бўлади. Автомобильнинг ташқи қиёфаси аввалги моделлардан кескин фарқ қилади, бироқ, шу билан бирга, замонавий Volkswagen`нинг ўзига хос услубларини ўзида сақлаб қолади ҳам.

Эслатиб ўтамиз, 2015 йилнинг июнь ойида Volkswagen Хитой бозори учун Phaeton седанининг янгиланган намунасини тақдим этган эди. Янгилик ўзгача хромланган радиатор панжараси, шакли ўзгартирилган оптика, панорама люки ва бошқача бамперга эга бўлган эди.

Олд ва орқа ғилдираклари ҳам етакчи ҳисобланган Phaeton мотор гаммасидан 3,0 литрли V6 бензинли двигатель ўрин олган. Мотор қуввати эса 250 от кучини ташкил этади. Шунингдек, 3,6 литрли бензинли V6 мотори билан ҳам таъминланади. Ушбу агрегат автомобилга 280 от кучи бахш этади. Модификацияланган седан эса 4,2 литр ҳамжга эга V8 двигатель билан таъминланган. Унинг қуввати 335 от кучига тенг. Ҳар учала мотор ҳам олти босқичли автомат трансмиссия билан биргаликда ишлайди.