Tesla янада арзонроқ батареялар ҳисобига кроссоверларининг нархини туширди

Tesla Model X электр кроссоверлари ихчамроқ ҳажмли батареяли янги базавий намунага эга бўлади. Бошланғич модификация 70D деб номланиб, келгуси йилдан савдога чиқарилади. Моделнинг нархи 80 минг доллардан бошланади, дея хабар бермоқда Ars Technica. Айни пайтдаги базавий кроссовер АҚШда энг камида 132 минг доллардан сотилмоқда.

Tesla Model X 70D кроссоверининг барча ғилдираклари етакчи бўлиб, батареясининг ҳажми 70 киловатт-соатни ташкил этади. Машина бир марталик қувват захираси билан 350 километргача масофани босиб ўта олади. Моделнинг энг юқори тезлиги эса соатига 225 километрни ташкил этади.

Дастлаб барча ғилдираклари етакчи бўлган иккита Model X модели савдога чиқарилган эди. Модификациялардан бири 90D номини олиб, 90 киловатт-соат ҳажмли батарея билан таъминланган. 100 километргача тезликка 4,8 сония ичида чиқа олади. Бир марталик қувват захираси билан эса 413 километр масофани босиб ўта олади. Бу – ҳозирча дунёдаги барча электр кроссоверлар ичидаги энг яхши кўрсаткичдир.

Илк Tesla электр кроссоверининг расмий намойиши 2015 йил сентябрь ойида бўлиб ўтган эди. Автомобиль эшиклари юқорига очилиб, иккита мотор билан таъминланган.

Дарҳақиқат, автомобил кузовининг асосий ўзига хослиги унинг юқорига очиладиган эшикларидир. Tesla раҳбари Илон Маск намойиш вақтида бундай механизмни “лочин қанотлари” деб атади. Унинг сўзларига кўра, эшикларга махсус ультратовуш датчиклари ўрнатилган бўлиб, автомобиль атрофидаги буюмларни мунтазам “кузатиб” боради. Агарда электроника бирор тўсиқни қайд этса, эшик автоматик равишда очилмайди. Олдинги эшиклар эса анъанавий усулда очилади, бироқ унга ҳам электр ўтказгичлар ўрнатилган бўлиб, улар Model X`га ҳайдовчи яқинлашганида автоматик равишда очилади.

Tesla кроссоверига уч қаторли ўриндиқлар ўрнатилган бўлиб, етти нафар йўловчи жойлашиши мумкин, агарда талаб қилинса, унга 2300 килограммгача юк ортиладиган тиркама уланади.

PD90 топ модификациясида ҳар бир ғилдирак ўқига биттадан электромотор ўрнатилган. Олдинги ўққа ўрнатилган двигатель қуввати 259, орқадаги мотор эса 503 от кучига эга. Model X`нинг ушбу намунаси 100 км/соат тезликка 3,2 сонияда чиқа олади. Бу эса SUV туркумидаги автомобиллар ичида рекорд натижа ҳисобланади. 90D бир марталик қувват захираси билан 402 километргача йўлни босиб ўта олади.