2015 йилнинг энг ёмон автомобиллари аниқланди

Асли машинаси йўқ одам учун автомобилнинг ёмони йўқ – бўлса “запорож” ҳам яхши. Сарлавҳада самарадорлиги ва турли кўрсаткичлари паст автомобиллар назарда тутилган.

Америкалик экспертлар 2015 йилнинг энг ёмон автомобиллари рўйхатини тузишди. Тадқиқотни истеъмолчилар қизиқишини ўрганувчи Consumer Reports журнали ўтказди.

Ўрганиш жараёнида журналистлар автомобиль эгаларига машинанинг қуввати, бошқарилувчанлиги, тежамкорлиги, дизайни ва бошқа кўрсаткичлари бўйича бир қанча саволлар беришди. Моделлар юз балли тизимда баҳоланди. Энг паст балл йиққан автомобиль кўрсаткичлари энг ёмонидир.

Рейтингда Jeep Wrangler Unlimited 20 балл тўплаб, “ёмон”ларнинг биринчиси бўлди. Ҳайдовчилар машинанинг қийин бошқарилиши, ёнилғини кўп сарфлаши ва ноқулайлигидан шикоят қилишган. Қизиғи шундаки, ўзлари паст баҳо беришганига қарамай, 76 фоиз қатнашчи Jeep Wrangler Unlimitedни яна қайта сотиб олишга хоҳиш билдирди.

Mitsubishi Mirage хэтчбеки эса 29 балл йиғди. Ҳайдовчилар уни тезлиги суст, шовқини баланд ва бошқарилиши оғир, деб баҳолашган. “Ёмон машина”ларнинг учинчиси Mitsubishi i-MiEV бўлиб, паст тезланиш олишидан ва интерьеридан айб топилган. Бу модель 35 балл йиғди.

Шунингдек, энг ёмон моделлар бешлигидан Scion tC (44 балл) ва Toyota Yaris (47 балл) ўрин олди.