Америка Chevrolet Aveo`ни янгилади (фото)

Chevrolet компанияси Sonic оиласи (Россия ва Ўзбекистон бозорида модел Aveo деб номланади)нинг янгиланган талқинини намойиш этди. Седан ва хэтчбекнинг оммавий намойиши март ойи охирида Нью-Йоркдаги моторшоуда бўлиб ўтади.

Рестайлинг қилинган “Соник” янги авлод Spark компакт-кари услубида ишлаб чиқилган ўзгача радиатор панжарасига эга бўлди. Бундан ташқари, модел ёруғлик диодли шакли ўзгартирилган асосий чироқлар, бошқа олд ва орқа бампер, янги капот ва ўзгача дизайндаги ғилдирак дискларига эга бўлган.

Chevrolet Sonic седани

Chevrolet Sonic седани

Интерьер фотосуратлари ҳозирча эълон қилингани йўқ, бироқ автоишлаб чиқарувчи “Соник”да модернизацияланган олд панел ва қиздириладиган ўзгача рул чамбараги бўлишига ваъда бермоқда. Бундан ташқари, модел билан етти дюймли дисплей, Apple CarPlay ва Android Auto`ни қўллаб-қувватловчи интерфейс, Wi-Fi нуқтаси ва LTE тармоғига уланиш имкони га эга янгича ахборот-кўнгилочар комплекс таклиф этилади.

Chevolet Sonic хэтчбеки

Chevolet Sonic хэтчбеки

Двигателлар сафи ўзгаришсиз қолади. Улар 1,8 литр ҳажмли “атмосфера” ва 1,4 литрли 138 от кучига эга турбомоторни ўз ичига олади. Трансмиссия – олти босқичли “механика” ёки худди шунча диапазондаги “автомат”.

Янгиланган Chevrolet Sonic оиласи автомобилларининг Америкадаги савдоси 2016 йил кузидан бошланади. Модел нархи тахминан 14,5 минг доллардан бошланади.