“Гугл-кар” велосипедчиларнинг ишораларини тушунишни ўрганди

Ҳозирги вақтда АҚШнинг умумий фойдаланувдаги йўллари ва синов полигонларида тажрибадан ўтказилаётган Google’нинг ҳайдовчисиз автомобили велосипедчиларни таниш, шунингдек, улар у ёки бу томонга бурилаётган ишлатадиган ишораларни тушуниш имконини берувчи янги дастурий таъминотга эга бўлди. Бу ҳақда Google’нинг ойлик ҳисоботида сўз боради.

360 даражали “кўриш қобилияти”га эга “гугл-кар” нафақат велосипедчиларни, балки бир ғилдиракли велосипедда кетаётганларни ҳам кўра олади. Компаниянинг қайд этишича, “гугл-кар” велосипедчиларга нисбатан ҳайдовчилардан кўра мулойимроқ муносабатда бўла олади.

Сунъий идрок шундай ишлиб чиқиляптики, машина велосипедчининг ногаҳоний, огоҳлантирмасдан бурилишларига ҳам тайёр туради. Автомобиль ўз тезлигини камайтириб, велосипедчининг хавфсиз бурилиб олишига имкон беради.

Бундан ташқари, Google’нинг ҳайдовчисиз автомобили йўл ёқасида қолдирилган машинанинг эшиги очилаётганини ва бу ҳолат олдинда бораётган велосипедчи билан йўл-транспорт ҳодисаси келиб чиқишига сабаб бўлишини “сезиб қолса”, ўз тезлигини пасайтириб, велосипедчининг бемалол ўтиб кетиши учун жой очиб беради.

Америка компаниясининг янги ҳисоботига кўра, ҳозирги вақтда АҚШ йўлларида Google автопилоти билан таъминланган 24 та Lexus RX450h кроссовери, шунингдек, Google’нинг ўзи томонидан ишлаб чиқилган ихчам хэтчбекнинг 34 та прототипи синов тариқасида ҳаракатланмоқда.