Ўзбекистон ярим йилда Россиядан 1,5 минг дона енгил автомобиль импорт қилди

2016 йилнинг биринчи ярим йиллигида Россия 12,2 минг дона енгил автомобилни экспорт қилди. “Колёса” нашрининг ёзишича, бу ўтган йилнинг шу даврига нисбатан икки баробар кўп.

Россия экспорт қилган автомобилларнинг аксарияти — 2,2 минг донаси Германияга етказиб берилган, эътиборли томони, Германия Россиядан импорт қилган автомобилларнинг кўпчилиги Volkswagen русумига тааллуқли.

Украина эса Россиядан 1,9 минг дона автомобиль импорт қилган бўлиб, моделлар орасида Lada, Chevrolet, Hyundai ва Volkswagen каби ишлаб чиқарувчиларнинг автомобиллари бор.

Учинчи ўринни Ўзбекистон эгаллади — 2016 йилнинг дастлабки олти ойи давомида Ўзбекистон Россиядан 1,5 минг дона автомобиль импорт қилган бўлиб, бу ўтган йилнинг шу даврига нисбатан 366 фоизга кўп.

Қайд этишларича, Россия автомобиллари Германия, Украина ва Ўзбекистондан ташқари Вьетнам, Миср, Камбожа, Куба, Белиз, Ливан, Эрон, Гонконг ва Болтиқбўйи мамлакатларига ҳам етказиб берилмоқда.