Элон Маск компаниясининг яқин ўн йилдаги режаларини ошкор қилди

Tesla компанияси асосчиси Элон Маск ўн йилга мўлжалланган режаларини бир-бир санаб берди. Бу режалар дунёни ўзгартириши муқаррардир.

Маск жаҳонни Қуёш энергиясидан фойдаланишга ўтказиш учун Tesla ва SolarCity компанияларини бирлаштирмоқчи. Бундан ташқари, теслачилар электрга ишловчи юк машиналари ва йўловчи автобуслари яратиш устида изланяпти. Бу транспорт воситалари келгуси йили намойиш этилади. Аммо Маск сюрпризларининг энг қизиғи Uber хизматига ўхшаш автомобиль парки бўлиб, унда Тесла авторусуми эгалари машинаси бўш вақтида ишлатиб пул топиши мумкин.

Тесланинг иккинчи тадбирлар тизимини тузиш Маскнинг хаёлига ўн йил муқаддам келган. Режанинг биринчи пункти амалдаги воқеликдан бир оз узоқ бўлиб, қиммат машина яратиш ва уни оз миқдорда ишлаб чиқариш кўзда тутиларди. “PayPalда ишлаб топган пулимга амалга оширадиган режамнинг бори шу эди. Муваффақиятга эришиш учун имкониятим жуда озлигидан бегона сармоячиларнинг пулини таваккал сарфлагим келмади. Автомобиль стартапчилари орасида омади келганлар жуда камдир. 2016 йилда Америка автомобилсозлик компаниялари орасида атиги иккитаси касодга учрамади: Ford ва Tesla”

“Автомобиль компаниясига асос солиш эсипастликдир. Электрли автомобиль компанияси ташкил этиш эса икки карра эсипастликдир”, деб ёзади Маск.

Биринчи режада дастлабки русумлардан келган фойда ҳисобига аста-секин машина нархини пасайтириш ва маҳсулот ҳажмини ошириш белгиланганди. Бу ишни амалга оширар экан Тесла кўп бор ОАВ танқидига учради. Уни “бойлар учун машина ишлаб чиқариш”да айблашарди. Танқидларга эътироз тариқасида Маск тушунтириш берди:

“… Ишнинг моҳияти барқарор энергетика пайдо бўлишини тезлатишдадир, бундан кейин ҳам шундай бўлади. Бу янада ажойиб ҳаёт сари келажакка хавотирсиз боқиш имконини беради. “Барқарор” нима дегани? Бу хиппининг қандайдир бемаънилиги эмас, ҳамма учун муҳим нарса”, дея Элон Маск режасининг тўртинчи пунктини тушунтира бошлайди. Бу пункт инсониятни Қуёш энергияси билан таъминлашга бағишланган.

Маск иқтисодиётни барқарор энергетика асосида қуриш лозимлигини, акс ҳолда қазилма ёнилғиларни ёқиб тамомлаб, тамаддун инқирозга учрашини айтади.

Бу мақсадга жадалроқ эришиш учун Маск иккинчи касбий режасини тақдим этди. Бу режа ҳам тўрт пунктдан иборат.

1. Аккумулятор батареялари билан интеграциялашган қуёш энергиясини тўпловчи фойдали томлар қуриш.
2. Инсон фаолиятининг асосий соҳаларини қамраб олиш учун электрли транспорт ишлаб чиқаришни ошириш.
3. Жонли ҳайдовчи бошқарувидан кўра ўн баробар хавфсизроқ бўлган автоном машиналар ишлаб чиқиш.
4. Автомобилдан фойдаланмаётган пайтингизда ҳам у орқали пул ишлашга эришиш.

Келинг, ҳар бир пунктга батафсил тўхталамиз.

Қуёш энергиясини тўплаш ва сақлаш

Маск жорий этадиган автоном энергетик тизимларни ўрнатиш ва хизмат кўрсатиш жуда осон бўлади. Натижада ҳар бир хонадон иситиш, ёритиш каби энергия билан боғлиқ муаммоларни батамом унутади.

Бунинг учун бутун дунёдаги уйлар томи қуёш панели билан қопланади. Ушбу мақсадни рўёбга чиқариш учун эса Tesla ва SolarCity бирлашуви лозим, деб ҳисоблайди Маск.

Ҳамма электрокарга ўтирсин

Tesla машиналари сафида ҳозирданоқ седан ва кроссоверни кўриш мумкин. Энди юк машинаси ва йўловчи автобуслари чиқаришни мўлжаллаяпти. Маск фикрича, электробуслар автоном бошқариладиган, эргономик ва ихчам бўлмоғи лозим. Йўловчи қайси бекатда тўхташ ҳақида смартфон орқали кўрсатма беради.

Йўловчи ва юк ташувчи транспорт воситалари ҳақида келаси йил муфассалроқ маълумот берилади, чунки улар устида ишлаш эндигина бошланди, деб ёзади Маск.

Автомобиль ишлаб чиқариш суръатини ошириш учун Tesla “машина тайёрлайдиган машина” яратмоқчи.

Автономлик

Элон Маск автоном автомобиллар ЙТҲлар сонини икки баробарга қисқартиришига ишонади. Аммо электрон дастурни одамдан яхшироқ ҳайдашга ўргатиш учун озмунча вақт кетмайди. Маск бунинг учун 10 млрд км йўл босиб ўтилиши зарур, деб ҳисоблайди. Ҳозирда эса автопилотлар ўқув машқларида кунига 5 млн км босиб ўтяпти.

Электромобиль эгалари Uber ташкил қилади

Зарур бўлганда смартфон иловаси орқали автомобилни чорлайсиз. Ҳайдовчисиз автомобиль “ўз оёғи билан” ҳузурингизга келади ҳамда тегишли жойга сизни элтиб қўяди. Йўлда янгиликларни ўқишингиз ёки овқатланишингиз мумкин.

Юқорида тасвирланган жараёндан хулоса ясасак, автомобиль соҳиблари ундан бор-йўғи 5-10 фоизга фойдаланмоқда. Маск эса Uber тартиби жорий этилишини таклиф қилади. Тасаввур қилинг: машинадан фойдаланмаётган вақтингизда у “Тесла” автожамланмасига тегишли саналади ва исталган одам такси сифатида фойдаланиши мумкин. Шу йўл орқали машина эгаси ҳисобига пул тушади.

Маск фақат Ерда ишлашни режалаштирмаган. Шу кунларда унинг SpaceX компанияси Falcon 9 ракета ташувчисини муваффақиятли қўндирди. 2018 йилда эса Марсга ракета учиришни режалаштиряпти.