Қўлбола машинада юрган хитойликка жарима солинди

Кечаги хабаримиздаги Жанубий Африкалик инженернинг ўхшашлари кўп экан. Хитойлик 34 яшар йигит ҳам қўлбола автомобиль ясади ва маҳаллий полицияни учратгунга қадар бамайлихотир миниб юрди.

Умумфойдаланиш йўлларида юрган қўлбола спорткар дизайни олақуроқ тарздадир. Орқадан Lamborghiniни эслатади, олдидан бир қанча машҳур маркаларнинг омихтасига ўхшайди. Капотида эса Porsche эмлемаси турибди.

Кузов панеллари полимер кўпигидан ясалган, двигатель мотоциклники. Узатмалар қутиси икки турдаги тезликка эга. Олақуроқ спорт машинасида фара, ускуналар панели, ҳаттоки, спортча ўриндиқлар ва бошқўйгичгача бор.

Аммо автомобиль учун энг муҳим бўлган давлат рақами, қайддан ўтказилганлиги ҳақида гувоҳнома сингари “икир-чикир”ларга суперкарсоз йигит ортиқча аҳамият бермади ва бу унга қимматга тушди. Ахир, Хитойда ноқонуний машина бошқаришга кескин чора қўлланади. Полиция унга 4500 юанлик (675 доллар) жарима белгилади. Ундан ташқари 12лик тизимдаги жарима балларидан 6тасини олди (ҳаммасини олса, ҳайдовчилик гувоҳномасидан ажралади).

Шунга қарамасдан бу ҳодисага некбинлик руҳида қараган маъқул. Негаки, дунёга машҳур автомобилсоз Энзо Феррари ҳам бир замонлар қўлбола машинада юрган.