Сеними, Tesla, шошмай тур!

Хитой электромобиллар борасида ҳали сезиларли натижага эришмаган. Бироқ ҳозирда давлат томонидан ушбу соҳага қаратилаётган алоҳида эътибор натижасида кескин ўзгаришлар юз бериши кутилмоқда. Хитой электроника гигантларидан бири LeEco электромобиллар ишлаб чиқаришга ҳисса қўшиш мақсадида Faraday Future компаниясини қўллаб-қувватламоқда. LeEco шу йилнинг апрель ойида ҳатто LeSee электрокарини намойиш қилган эди. Компания Хучжоу шаҳри атрофида 1.8 млрд АҚШ долларига тенг ва бир йилда 400, 000 дона  электромобил ишлаб чиқариш қувватига эга бўлган завод қурмоқчи.

Завод фақатгина уланган ва ҳайдовчисиз бошқарув функцияларига эга бўлган электромобилларни ишлаб чиқаради. LeEco ушбу заводнинг барпо этилиши йирик — тахминан 3 млрд долларга тенг бўлган «Eco Experience Park» инфраструктуранинг бирламчи босқичи эканлигини қайд қилиб ўтган.

Компания соҳадаги ҳамкори Faraday Future билан алоқаларини янада мустаҳкамламоқчи. Айтмоқчи, Faraday Future компаниясининг ўзи ҳам АҚШнинг Невада штатида 1 млрд АҚШ долларига тенг элекрокар ишлаб чиқарадиган заводни қурмоқда. Бундан ташқари, у Калифорния штатидаги Валлежо шаҳрида иккинчи заводини ҳам қуришни режалаштираётгани ҳақида хабар берган эди.

Шубҳасиз, юқорида номи тилга олинган Хитой ва АҚШ компанияларининг электромобиллар яратишга қаратилган ҳаракатлари таҳсинга лойиқ. Лекин, вазиятга реал назар ташланса, улар ҳозиргача шунчаки бир нечта футуристик электрокарларни намойиш қилган, холос. Дунё бозорига ҳали бирор электромобил сотувга чиқаришмаган. Faraday унинг илк сотувга чиқариладиган электрокари кейинги йилнинг бошида тақдим этилиши ва у FFZero1 суперкари платформаси базасида яратилиши тўғрисида хабар берган. LeEco эса LeSEE моделининг ўзиюрар версиясини ишлаб чиқармоқчи. Соҳадаги энг илғор компания – Tesla эса Невада штатида 4-5 АҚШ долларига тенг заводини барпо этиб, айни вақтда 2 та моделдаги электромобилларни сотувга чиқарган ҳамда яқинда учинчи авлод Model 3 автомобилини намойиш қилган эди.