Audi янги спорт йўлтанламасини тайёрлайди

Германиянинг Audi компанияси Audi TT Offroad Concept  мотивидаги Audi TT купеси базасида янги спорт йўлтанламасини ишлаб чиқаришни режалаштирмоқда. Янги кросс-купе BMW X4 ва Mercedes-Benz GLC Coupe моделлари билан бозорда рақобат қилиши кутилмоқда. Баъзи ресурсларда берилган маълумотларга кўра, янги йўлтанламасга Audi Q4 (аввалроқ модель Audi TTQ деб аталиши ҳақида хабар тарқалган эди) номи берилади.

Шу билан бирга, Audi мазкур моделнинг янада кучайтирилган версиясини ишлаб чиқариши мумкин. Сабаби компания ўтган ой патент органларида Q4 индексидан ташқари SQ4 маркасини ҳам рўйхатдан ўтказган. Ушбу маълумотни Auto Evolution нашри ҳам тасдиқлаган. Янги кросс-купе Audi Q4 гибрид ва тўлиқ электр қувватида ҳаракатланадиган модифицияларда тайёрланади. Янги моделга асос вазифасини бажарадиган Audi TT Offroad Concept (суратда) автомобилида ҳам гибрид мотор ўрнатилган бўлиб, электр агрегатда у 50 км масофа босиши мумкин. Ҳозирча Audi Q4 кросс-купесининг намойиш санаси бўйича аниқ маълумот берилмаган.