2015 йилнинг энг катта автомобиль бозорлари аниқланди

2015 йил давомида дунё автомобиль компаниялари 90 млн автомобилни сотишга эришди. “Автостат” агентлиги focus2move порталига таяниб ушбу маълумотни келтирди. Транспорт воситаларининг энг кўп сотилиши бўйича Хитой барчадан олдинда. Осмоности ўлкасида 25 млн автомобиль харидорига етиб борган (+6 фоизлик ўсиш). Дунё бозоридаги Хитойнинг ҳиссаси 28 фоизга тенг.

Рўйхатнинг иккинчи поғонасида – АҚШ. Ўтган йилда 17,5 млн автомобиль сотилган. Бу 2014 йилга нисбатан 5,7 фоиз ортиқ натижадир. 5 млн автомобиль сотилганлиги билан Япония учликка якун ясайди (-7,9 фоиз).

Кейинги ўринда Европадаги энг катта автобозор соҳиби Германия турибди. Немис автомобилсозлари 3,2 млн автомобиль сотишган (+5,6 фоиз). Бешинчи ўринда 2,78 млн автомобиль сотилганлиги билан Ҳиндистон 8,7 фоиз ўсишга эришган.

Рўйхатнинг кейинги ўринларида:

Буюк Британия (2,63 млн дона, +6,3%),

Бразилия (2,48 млн дона, -25,6%),

Франция (1,92 млн дона, +6,8%),

Канада (1,9 млн дона, +2,6%),

Жанубий Корея (1,82 млн дона, +13,1%).

Ўн бешликдаги мамлакатлар ичида Япония, Бразилия ва Россиядан ташқари барчасида ўсиш қайд этилган.