Америка, Европа ва Россиядаги энг харидоргир автомобиллар

Экспертлар АҚШ, Европа ва Россиядаги энг харидоргир автомобиль русумлари рўйхатини тузишди.

“Автостат” агентлиги қайд этишича, Россия бозорида ўртача катталикдаги седан ва В-класс хэтчбеклари савдоси қизғин, бу қаторга кичик кроссоверларни ҳам қўшиш мумкин, масалан, Renault Duster. 2015 йил январь-сентябрь ойлари орасида энг харидоргир ўнлик бошида Lada Granta, иккинчи ўринда Hyundai Solaris, учинчи ўринда эса Kia Rio турибди. Ўтган йил айни давридаги ҳолат бундан анча фарқли бўлган.

Европаликлар ҳам В ва С-классдаги ихчам автомобилларни хуш кўришади, шу билан бирга седан эмас, хэтчбекнинг бозори чаққон. 2015 йил 9 ой муддати таҳлилига кўра Volkswagen Golf Европа автобозорида энг кўп сотилган автомобиль. У иккинчи ўриндаги Volkswagen Poloдан икки баробар яхши натижа кўрсатган. Бундан ташқари бешликдан Renault Clio, Ford Fiesta ва Opel Corsa машиналари жой олган. Айтиш керакки, Ford Focus ва Peugeot 208ни ҳисобга олмаганда ўнликдаги бошқа автомобилларнинг рейтингда ижобий динамикаси қайд этилди.

Шимолий Америкада эса харидорлар каттакон пикаплар ,йўлтанламас, йирик седан ва универсал машиналарни маъқул кўрар экан. 2015 йил январь-сентябрь ойлари таҳлилига кўра, энг бозори чаққон Ford F-Series, иккинчи ўринда Chevrolet Silverado, учинчи ўринда эса Dodge RAM автомобилидир. Умумий таҳлилда Toyota Camry, Honda Accord ва Honda Civiс савдоси сусайгани қайд этилди.