АҚШ: кўчада шовқин солиб юринг

АҚШ транспорт вазирлиги мамлакатда сотиладиган барча гибрид ва электрли транспортлар шовқин генератори билан жиҳозланиши лозимлиги ҳақидаги қонунни қабул қилмоқчи.

Ҳар йили минглаб велосипедчи ва пиёдалар, хусусан, кўзи ожиз йўловчилар ғилдирак остида қолади. Йўлда электромобиль ҳаракатланганда эса ҳалокат хавфи 19 фоизга ошади, чунки йўловчи ё велосипедчига яқинлашаётган электромобилнинг товуши эшитилмайди.

Ушбу қонун лойиҳасини АҚШ Конгресси 2010 йилда кўриб чиққан, бироқ бир қатор сабабларга кўра қабул қилинмасдан келинаётганди. Бироқ электромобилларнинг тобора кўпайиб бориши мазкур қонун лойиҳасини яна қўлга олишга мажбур қилди. Агар у қабул қилинса, келаси йили Америка сотилаётган электромобиль ва гибридларнинг 50 фоизи тезлиги 30 км/соатгача бўлганда шовқин чиқарувчи генератор билан жиҳозланади. 30 км/соатдан ошганда эса ясама шовқиннинг ҳожати йўқ, чунки машина ўзи табиий шовқин чиқара бошлайди.

Қонун электромобиль қай турдаги товуш чиқаришини тартибга солмайди. У двигателнинг овозига ўхшаш ёки бошқача бўлиши мумкин, муҳими уни масофадаги пиёда ва велосипедчи эшитсин.

Автомобиль ишлаб чиқарувчилар бу қонунни хурсандчилик билан кутиб олмайди. Чунки машинага қўшимча жиҳозлар улар учун 40 млн долларга тушади.

Бундан ташқари айтиб ўтиш керакки, айрим автомобилсозлик компаниялари бу қонунсиз ҳам машиналарига шовқин генератори ўрнатиб чиқараётганди.