АҚШдаги энг яхши автомобиллар рўйхатида немис маркалари етакчи

Истеъмолчиларнинг муносабатини тадқиқ қилувчи Consumer Reports мустақил компанияси АҚШда сотиладиган энг яхши ва ёмон автомобилларнинг йиллик рейтингини тузди.

Consumer Reportsнинг бу йилги рейтингида сардорлик Американинг эмас, хорижнинг автомобилига насиб этди. Дастлабки уч қаторни немис машиналари эгаллагани диққатга сазовордир. Биринчи ўринда Audi, иккинчида Porsche ва учинчида BMW.

Энг яхши ўнликка Американинг иккитагина бренди кира олган. Саккизинчи ўринда Tesla бўлса, ўнликнинг якунида General Motors Co Buick бренди.

Рейтингнинг 31-қаторидан Fiat жой олган.

Рейтинг тузувчилари хориж, хусусан, Европа брендларининг мавқеи яхшиланаётганлигини қайд этади. Тадқиқот муаллифларидан бири Жейк Фишернинг фикрича, европаликлар ишончлилик бўйича устунликлари ҳисобига бу натижага эришди. “Бир-иккита аъло автомобиль тайёрласа бўлади, аммо русумлар қаторининг барини аъло даражадаги машинага айлантириш анча мураккаб”, деди у.

Япон брендлари ҳам чакки эмас. Биринчи ўнликда Mazda ва Hondaни кўриш мумкин. Toyota бренди сўнгги йилларда биринчи марта ўнликка кирмай қолди, аниқроғи 11-қаторга тушди.

Умумий рейтинг билан бир қаторда ўнта категория бўйича йилнинг энг яхши янги автомобилига ҳам овоз берилган. Ўз туркумидаги “энг яхши”лар қуйидагилардир: “субкомпакт автомобиль” — Toyota Yaris; “компакт гибрид” — Toyota Prius; “премиум кроссовер” Audi Q7; “спорткар” — Mazda MX-5; “кичик кроссовер” — Subaru Forester; “ўрта ўлчамли кроссовер” — Toyota Highlander; “компакт пикап” — Honda Ridgeline; “компакт автомобиль” — Chevrolet Cruze; “ўрта ўлчамли седан» — Kia Optima ва “катта седан” — Chevrolet Impala.

Consumers Report истеъмолчиларнинг фикр-муносабатига асосланган ҳолда турли товар ва хизматларни ўрганиш натижаларини чоп этувчи Американинг нуфузли журналидир. Журналнинг ҳар йиллик рейтинги АҚШ ҳудудида сотиладиган машиналар асосида тузилади. Машиналарнинг ишончлилиги, расмий ва норасмий тўқнашув тестлари ҳамда мижозларнинг берган баҳосига асосланиб, ҳар бир авторусум учун ўртача балл ҳисобланади. Умумий рейтингдан ташқари тадқиқотда “энг яхши “иккинчи қўл” автомобиль”, “эгасининг қаноатланганлиги”, “тавсия этиладиган автомобиль” ва шу каби бошқа категорияларга ўрин берилади.