Asia-Plus: Ravon Тожикистон автобозорини забт этадими?

Ўтган йил апрелида Душанбеда бўлиб ўтган Ўзбекистон саноат маҳсулотлари ярмаркасида Ravon автомобиллари тожикистонликларда катта қизиқиш уйғотганди. Бу ҳақда Asia-Plus ҳикоя қилмоқда, деб ёзади Daryo.uz.

Кўргазма якунланиб, тегишли шартномалар тузилганидан сўнг 2017 йил 18 июлда Душанбеда Ravon автосалони очилди. Ўшандан бери ярим йилдан кўпроқ вақт ўтди.

— Душанбеликлар ва пойтахт меҳмонларига R2, R4, Gentra, Nexia R3, Damas, шунингдек, Labo русумли автомобиллар таклиф этилмоқда. Шу ернинг ўзида автосервис ва эҳтиёт қисмлар омбори ҳам жойлашган. 7 ой мобайнида 250 та автомобиль олиб келдик, улардан 220 тадан кўпи сотилди. Харидор буюртмасига кўра автомобиль 5-10 кун ичида олиб келинади. Мижозларимиз орасида нафақат жисмоний шахслар, балки давлат муассасалари ҳам бор, — дейди автосалон директори Фаррух Замонов.

Тожикистонликларга Ravon автомобилларининг қулай нархи (Ravon R2 7450, Ravon Gentra 12700 доллардан таклиф этилмоқда) ва ISO хавфсизлик стандартларига жавоб берадиган сифати маъқул келмоқда. Ҳозирда Хўжандда ҳам автосалон очиш ва ушбу марказларга автомобилларнинг янги моделларини келтириш режалаштирилмоқда.

Автосалонда 2007—2012 йилларда тожик клублари таркибида ўйнаган, ҳозирда футбол агенти бўлган ганалик Чарльз Накутини учратдик.

—Ravon моделлари билан танишман, яхши машиналар. Шунингдек, машинага 3 йил кафолат берилиши ва кредитга сотиб олиш имконияти ҳам маъқул. Қолаверса, ганалик йигит Тожикистон йўлларида ўзбек автосини ҳайдаб кетаётганини тасаввур этишнинг ўзи ҳам ажойиб, — дейди Чарльз Накути.