Audi 3Д принтерда босиб чиқарилди

Саноат ускуналари билан шуғулланувчи Audi Toolmaking бўлинмаси 3Д принтерни автомобилсозликда қўллаш мумкинлигини намойиш этди. 30-йиллар пойгаларида соврин олган Auto Union Type C болидининг 1:2 нисбатда масштаблаштирилган кўринишини 3Д принтердан чиқарилди. Кузов панеллари енгил қотишмадан ясалди. Расмга қараб хулоса қилсак, машина юради, аммо немислар техник тафсилотлари сирини ошкор қилмади.

“Болид”, деб, одатда, бир одам (ҳайдовчи) сиғадиган, ғилдираклари кузовдан туртиб чиқиб турган пойга автомобилларига айтилади. Бу турдаги автомобиллар ўтган аср бошларида АҚШда яратилган.

Яқин келажакда саноат принтерлари турли соҳаларда кенг қўлланилишига Audi Toolmaking бўлинмаси мутахассислари ишончи комил. Ҳозирда болғалаш ва қуйиш йўли билан ясаладиган агрегат ва узелларни (мураккаб механизмнинг бир қисми) 3Д принтер ёрдамида тайёрлаш мумкин. Бугунги кунда Audi Toolmaking бўлинмаси ишлатаётган 3Д принтерлар алюминий ва пўлатдан бирмунча йирик ҳажмли деталларни ясайди. Volkswagen компанияси бу хил технологияга астойдил қизиқмоқда, келгусида автомобилсозликда қўллаш режаси бор.

Айтганча, Audi бу технологияни қўллаганларнинг биринчиси эмас. Бир неча йил муқаддам Opel компанияси Opel Adam хэтчбекини 3Д принтердан чиқарган эди. Тўғри, у пластикдан тайёрланган эди, шу сабаб тўлақонли автомобиль ҳисоблаб бўлмайди.