Audi ҳар йили биттадан электромобиль чиқаради

Audi компанияси 2018 йилдан бошлаб ҳар йил биттадан электрокар ёки гибридга уланадиган автомобиль ишлаб чиқаради. Бу ҳақда Audi’нинг йиллик умумий мажлисида ширкат раҳбари Руперт Штадлер маълум қилди.

Audi’нинг тўлиқ электр юргизгичли илк оммавий автомобили, тахминларга кўра, Q6 e-tron номини оладиган кроссовер бўлади. Модель 2018 йилдан бошлаб Брюсселда ишлаб чиқарилади, бу корхонада, шунингдек, мазкур автомобиль учун батареялар ҳам тайёрланади.

Audi q-tron quattro

2015 йил сентябрида Франкфурт автосалонида намойиш этилган тажрибавий q-tron quattro автомобиль электр кроссовер учун прототип вазифасини бажарган. Концепт олд осмада битта, орқа осмада иккита — жами учта электромотор билан таъминланган эди. Юргизгичларнинг умумий қуввати 435 от кучига тенг эди, бироқ зарурат туғилганида улар 503 от кучигача қувват бера олади.

Audi q-tron quattro

Кроссовер 4,6 сония ичида соатига 100 километрлик тезликка эриша олади, унинг энг юқори тезлиги соатига 210 километр билан чеклаб қўйилган. Прототип бир марта тўлиқ қувватлантирилганидан сўнг 500 километрдан ортиқ йўл юра олади.

Audi prologue

Бундан ташқари, Руперт Штадлернинг тасдиқлашича, 2017 йилда Audi компанияси кейинги авлод A8 автомобилини намойиш этади. Янги автомобиль намойиши 2014 йил охирида бўлиб ўтган prologue концепт-каридан кўплаб услубий ечимларни олади.

Audi prologue

Audi раҳбарининг маълум қилишича, A8 “ҳайдовчисиз бошқарувнинг самарали функцияларига эга сериялаб ишлаб чиқариладиган жаҳондаги илк автомобиль бўлади”. Янги автомобиль мустақил ҳаракатлана олади, шаҳар тирбандлиги шароитида, шунингдек, катта йўлда соатига 60 километргача бўлган тезликда ўзи қайрилиб, бурила олади. Штадлернинг қайд этишича, тўлиқ автопилотли автомобиллар 2025 йилдан йўлларда пайдо бўлади.