Автокомпаниялар рекламага қанча пул сарфлаши аниқланди

Global Equities Research агентлигининг мутахассислари автокомпаниялар ўз маҳсулотини оммалаштириш ва пиар учун қанча пул сарфлашини баҳолади. Таҳлилчилар ҳар бир сотилган авторусум рекламасига қанча пул кетганини ҳисоблаб чиқди.

Тахмин қилинганидек шоҳона брендлар рекламаси пулни гирдобдек ютиши маълум бўлди. Бу борада Jaguar компанияси билан беллашадигани йўқ – ҳар бир сотилган автомобилнинг рекламасига 3325 доллардан сарфланган. Иккинчи ўринда Ford Motor бўлиб, битта Lincolnни сотишга 2550 доллар чиқим қилади. Кейинги ўринларни Fiat (2158 доллар), Lexus (1168 доллар) ва Cadillac (1163 доллар) компаниялари эгаллади.

Porsche, Honda ва Toyotaлар рекламага 240-270 доллар оралиғида маблағ сарфлайди, улар рўйхатнинг энг пастки қисмида.

Ажабланарли томони Tesla бу борада ўта қурумсоқлиги маълум бўлди. Дарвоқе, унинг маҳсулотларига рекламанинг балки зарурати йўқдир? Элон Маск компанияси ҳар бир русум учун рекламага 6 доллардан сарфлар экан. Бу ягуарчиларнинг чиқимидан 554, тойотачиларникидан 41 баробар камдир.

Реклама борасида “Тесла”нинг ўта камхаражатлиги кишини ҳайратга солади. Бироқ ўн йил давомида бу компания оддий одамларнинг онгида электромобилларга муносабатда инқилоб қилди дейиш мумкин. Чунки “Тесла”га қадар омма электромобилни секин, ноқулай ва қиммат транспорт деб биларди.

Global Equities Research таҳлилчиси Трип Чоудхри “Тесла”нинг рекламага кам пул сарфлаши рақобатчиларидан бениҳоя устунлигини таъминлашини қайд этди. Чунки жуда катта миқдордаги тежалган маблағ ёнга қолади.

Ҳар бир сотилган автомобилнинг рекламаси учун сарфланган маблағ жадвали (қисқартириб олинди)