Автомобилда узоқликка сакраш бўйича янги рекорд ўрнатилди (Видео)

Америкалик пилот Брайс Мензис Pro2 маркасидаги пойга пикапида 115, 64 метр узоқликка сакраб, бундан аввалги жаҳон рекордини янгилади ва Гиннеснинг рекордлар китобига киритилди.

Мензис ушбу рекордни янгилашни узоқ йиллар давомида режалаштирган ва  шу йилнинг баҳоридан бошлаб мазкур трюкка тайёргарлик кўра бошлаган. Ўтган тўрт ой мобайнида пойгачи ва унинг жамоаси Pro2 автомобилининг подвескасини созлаш ва мос трамплинни аниқлаш мақсадида АҚШнинг Сан-Диего шаҳрида жуда кўп сакрашларни амалга оширишган.

Автомобилда 115, 64 метр узоқликка сакраш Нью-Мексико штатидаги ташландиқ шаҳарлардан бирида бўлиб ўтган. Пойгачи мазкур натижадан илҳомланиб ҳатто ўзининг рекордини янгилашга ҳаракат қилган. Бироқ иккинчи уринишда у елкасини синдириб олган. Шундай бўлса-да, биринчи уринишда ўрнатилган натижа Гиннеснинг рекордлар китобига кириш учун етарли бўлган.

Автомобилда узоқликка сакраш бўйича бундан олдинги рекорд америкалик Таннер Фостга тегишли бўлган. У 2011 йилда Индианаполис пойгаси арафасида 101,2 метрли натижани қайд этган. 2014 йилда Фостнинг рекордини француз Герлен Шишери янгилашга ҳаракат қилган. Аммо унинг уриниши жиддий автоҳалокат билан якун топган.