АвтоВАЗ 2025 йилгача 8 та янги автомобиль ишлаб чиқаради

Россиянинг АвтоВАЗ компанияси келгуси 9 йил мобайнида 8 та янги моделни ишлаб чиқаради. Бу ҳақда “Автосреда” нашри компания раҳбари  Николя Морга таяниб хабар бермоқда.

Топ-менеджер Москвада ўтказилган халқаро “Автомеханика” кўргазмасида компаниянинг келгуси режалари тўғрисида маълумот берган. Шунингдек, Морнинг айтишича, яна 8 та моделнинг янгиланиши режалаштирилган.

АвтоВАЗ 2019 йилда 2 та янги автомобилни ишлаб чиқариш мақсадида. Нашрнинг ёзишича, гап XCODE ва Lada 4×4 NG моделлари ҳақида боряпти. XCODE модели тўғрисида аввалроқ сайтимизда маълумот бериб ўтган эдик. Шу билан бирга ушбу йилда компания 4 та моделнинг янгиланган версиялари ҳам ишлаб чиқаради. Ҳозирча булар Granta, Largus, Kailna бўлиши ҳақида тахминлар билдирилмоқда.

2020-2022 йилларда завод конвейерида яна 3 та янги автомобиль тайёрланади, битта модель қайта рестайлинг қилинади. 2023-2025 йиллар давомида эса компания яна 3 та янги моделни ишлаб чиқаришни режалаштирган.

Бу йилги Москва автосалонида компания 6 та янги концептни намойиш қилишни кун тартибига қўйган. Бу Lada тарихидаги энг сермазмун экспозиция бўлиши кутилмоқда. Автосалонда тақдим этиладиган компаниянинг асосий янгилиги XRAY базасида ишланган янги кроссовер бўлади. Беш эшикли автомобилнинг кузови икки хил рангда бўялиб, компаниянинг янгича услубида тайёрланади. Кроссоверга  XCODE номи берилиб, унинг ўлчамлари XRAY хэтчбекидан йирикроқ бўлиши айтилган.