АвтоВАЗ бир тунда Lada Vesta сотиш режасининг бешинчи қисмини тўлиқ бажарди

Ўтган тунда АвтоВАЗ мингта автомобилдан иборат Lada Vesta`нинг биринчи партиясини тўлиқ сотиб улгурди. Бундан ташқари, янги седан учун яна 1,5 мингта буюртма қабул қилди. 2015 йил сўнгига қадар АвтоВАЗ 5 минг дона атрофида Vesta сотишни режалаштирган.

“Кўплаб дилерларда кассалар эрталабга қадар ишлади. Олдиндан буюртма қилиш тизимимиз йўқ, бироқ ҳар бир дилерда Vesta`ни биринчи кунданоқ сотиб олишга тайёр садоқатли мижозлар рўйхати мавжуд. Бу одамлар машиналарни харид қилиб бўлди ҳам”, — дея хабар берди АвтоВАЗ вакили Autonews.ru мухбирига.

Lada Vesta савдоси 24 ноябрь куни Россиянинг 24та йирик шаҳрида бир вақтда бошланди. Машиналарнинг  биринчи партияси 60та Россия дилери автодўконларида пайдо бўлди. Улар учта комплектацияда тақдим этилмоқда: Classic, Comfort ва Luxe. Модель нархи эса 514 минг рублдан бошланади. Янги седан В ва С тоифалари оралиғида жойлашган бўлиб, айни пайтда АвтоВАЗнинг энг йирик модели ҳисобланади. Унинг узунлиги 4410 мм, кенглиги 1700 миллиметрдан иборат.

Биринчи ойларда Россиянинг 16 клапанли мотори ўрнатилган Vesta`лар савдога чиқарилади. Моторининг ҳажми 1,6 литр бўлиб, 106 от кучига эга. Двигатель 5 босқичли француз “механикаси” ёки Kalina, Granta ва Priora моделларидан қўлланилган роботлаштирилган автомат тезлик узатмалар қутиси билан жуфтликда ишлайди. 8 клапанли, 87 от кучига эга 1,6 литр сиғимли мотор ўрнатилган Vesta кейинги йилдан савдога чиқарилиши мумкин.

Шунингдек, кейинроқ янада кучлироқ агрегатлар: 1,6 литрли 114 от кучига эга Renault Nissan альянсининг H4M двигателлари ёки ВАЗнинг 1,8 литрли 123 от кучига эга “тўртталиги” пайдо бўлади. Барча моторлар Евро-5 экологик меъёрларига мос келади.