АвтоВАЗ Lada Largus моделини янгиламайди

Россиянинг АвтоВАЗ компанияси бу яқин орада Lada Largus моделининг ташқи дизайнини Х-стилистикасига мувофиқ янгиламоқчи эмас. Бу ҳақда Kolesa.ru нашри компаниядаги манбага таяниб шундай хабар берган.

Манбанинг нашрга берган маълумотига қараганда, Lada Largus айни пайтда барқарор равишда сотилаётган моделлардан ҳисобланади. Баъзи ҳолатларда автомобилни ҳатто дилерларга етказиб беришга улгурилмаяпти. Шу йилнинг олти ойлик статистикасига асосан модель Россияда энг кўп сотилган автомобиллар ўнталигига кирган.

Бироқ АвтоВАЗ Lada Largus’нинг техник кўрсаткичларини кучайтиришни режалаштирмоқда. Автомобилга янги функция ва имкониятлар қўшилиши мумкин. Айни пайтда ушбу моделнинг 5 ва 7 ўриндиқли (кросс ва фургон) версиялари харидорларга таклиф этилмоқда. Автомобилнинг Россиядаги нархи 499,900 рублдан (7700 АҚШ долларига тенг) бошланади.