“АвтоВАЗ” ўнг рулли автомобиль билан Европа бозорига чиқмоқчи

“АвтоВАЗ” раҳбари Николя Мор ОАВ билан суҳбатда рули ўнг томонда жойлашган автомобиль ишлаб чиқарилиши эҳтимолидан сўз очди.

Рус автокомпанияси ўз маҳсулотларини Европа бўйлаб янада кенгроқ ёйиш мақсадида мазкур қарорга келди. «АвтоВАЗ» мутахассисларининг хомаки ҳисоб-китобига кўра бу тадбир Lada савдосини икки баробарга ошириши мумкин.

Рус компанияси ҳозирги вақтда Европанинг етти давлатига машина экспорт қилаётганини Мор айтиб ўтди. Германия ва Венгрияда “Лада” савдоси яхши кетяпти. Шунингдек, Словакия, Сербия ва Болтиқбўйи давлатлари рус автомобилларига қизиқиш билдирмоқда.

Сўнгги вақтда ғарб давлатларида ўрнатилган қатъий хавфсизлик ва экологик талаблар рус автомобилларининг Европа бозорига янада кўпроқ киришига тўсқинлик қилмоқда.

Европа мамлакатлари автомобилсозлардан тўқнашувнинг олдини олувчи, ҳайдовчи ва йўловчиларнинг хавфсизлигини таъминловчи замонавий тизимлар ўрнатишни талаб қилмоқда, булар эса автозаводларга қимматга тушмоқда. Янгича тизимлар “Лада”га ўрнатилиши машина нархини анча-мунча оширади ва европалик автомобилсозлар билан рақобатга дош беролмай қолади.

Компания менежерлари ишлаб чиқариш харажатини камайтириш ва машина таннархини тушириш билан шуғуллана бошлади. «АвтоВАЗ» эса бир неча давлатларнинг бозорига кўзини тиккани ва кўп турдаги авторусум ишлаб чиқариш режасини эълон қилди.