АвтоВАЗ хэтчбек кузовли Lada Vesta моделидан воз кечади

АвтоВАЗ хэтчбек кузовли Lada Vesta моделининг янги версиясини ишлаб чиқмайди. Бу ҳақида “Автосреда” нашри хабар бермоқда. Компания бундай моделни яратишни мақсадга мувофиқ эмас деб ҳисоблайди. Аввалроқ янгиланган Lada Vesta 2017 йилнинг куз ойларида сотувга чиқарилиши тўғрисида маълумот берилган эди.

Компания президенти Николя Морнинг сўзларига кўра, айни вақтда тайёрланаётган Lada Vesta’нинг универсал версияси кўплаб харидорларни, жумладан, хэтчбек моделини хуш кўрадиган мижозларни ҳам қизиқтириши мумкин. Универсал модель, олдин хабар берилганнидек, икки хил вариантда ишлаб чиқарилади. Автомобилнинг ертанламас версияси Lada Vesta Cross  номи билан аталади ва шу йилнинг сентябрь ойидан бошлаб конвейердан чиқа бошлайди. Ушбу машина компаниянинг Ижевскдаги заводида йиғилади. Сайтимизда бир неча кун олдин эълон қилинган мақолада ёзилганидек, автомобиль аввалда олд узатмали тизимга эга бўлади. Кейинчалик эса тўлиқ узатмали модификация ҳам ишлаб чиқарилиши кўзда тутилган.

Ертанламас модификациядан ташқари АвтоВАЗ Lada Vesta моделининг оддий сериясини тайёрлашни ҳам режалаштирган. Норасмий маълумотларга қараганда, ушбу модель номига SW префикси қўшилиши мумкин.

Vesta маркасини серияли ишлаб чиқариш ўтган йилнинг 25-сентябрида ИжАвто заводида бошланган. Автомобиль эса сотувга 24-ноябрда чиқарилган. Аввалги ойларда моделнинг 16 та клапанга эга моторли версияси фақат Россия бозорида сотилган. Автомобиль 1,6 литрли двигателда ҳаракатланади, 106 та от кучига эга, айланиш моменти – 148 Нм. Мотор 5 поғонали француз механикаси ёки Kalina, Granta ва Priora моделларига ўрнатилаётган  роботлаштирилган AMT коробка ёрдамида бошқарилади.

Шунингдек, сал кейинроқ янада кучайтирилган агрегатлар пайдо бўлган. H4M альянсига тегишли 1.6 литрли 114 та от кучига эга Renault Nissan ҳамда АвтоВАЗнинг тўрт эшикли 1,8 литрли 123 та от кучидаги моделларини буларга мисол қилиш мумкин. Барча моторлар Евро-5 экологик меъёрларига жавоб беради.