Биткоинга машина сотиш бошланди

Ўз курсини кўз очиб-юмгунча ўзгартириб турувчи электрон валюта автомобиль савдосига ҳам аралашди. Moonlambos автосалони бир неча турдаги суперкарларини криптопулга сотмоқчи.

Янги Lamborghini Aventador LP 750-4 Superveloce Roadster суперкарини 50,41 биткоинга харид қилиш мумкин. Бу тахминан 715 минг долларга тенг. Автосалоннинг Лондонда ва Калифорнияда офиси бор.

Атиги бир неча йил муқаддам 50 биткоинга оддий кийим сотиб олиш мумкин эди. Ҳозир суперкар сотиб оладиган даражада қиймати ошгани эътиборлидир.

“Мунламбос”да “арзон” суперкарлар ҳам сотилади. 2005 йилда чиқарилган Aston Martin DB9 V12 Coupe 4,99 биткоин, 1965 йилда чиқарилган Mercedes-Benz 230 SL Pagoda 5,76 биткоин, 1982 йилда чиқарилган Ferrari 308 GTSi 5,95 биткоин нархда туради.

Яқин йиллар ичида УАЗ автозаводи ҳам криптовалютага автомобиль сотмоқчи. Аммо у биткоин эмас, ўз валютаси биокоинга сотади. Қисқаси, криптовалютани йиғаверинг, у бизнинг бозорга ҳам кириб келишини назардан соқит қилолмаймиз.