BMW 2019 йилда 7-Series купесини намойиш этади

BMW компаниясининг мутахассислари 7-Series купесини яратиш устида иш бошладилар. Bloomberg нашрининг хабар беришича, моделнинг намойиши 2019 йилга режалаштирилган.

7-Series туркумидаги янги автомобилнинг техник хусусиятлари тўғрисида ҳозирча маълумот йўқ. Бироқ янги купе автомобиль бозорида Mercedes-Benz’нинг S сериясидаги моделлар билан рақобат қилиши тахмин қилинмоқда. Mercedes-Benz S сериясида тўрт эшикли модель, купе ва кабриотлет ўрин олган.

Манбада ёзилишича, компания 7-Series моделларининг жорий сотувидан қониқмагани туфайли ушбу купени ишлаб чиқишга қарор қилган. BMW расмийларининг фикрича,  ушбу сериядаги жорий моделнинг дизайни талаб даражасида эмас, юқори технологияли функциялар эса унда кам қўлланилган.

Немис компанияси бундан 3 йил муқаддам Gran Lusso номли купе концептини намойиш қилган эди. Концептни яратиш устида Pininfarina ательесининг мутахассислари иш олиб боришган. Прототип  7-Series’даги тўрт эшикли модель базасида яратилган. Кейинчалик автошоуда тақдим этилган ушбу концепт аслида BMW’нинг энг йирик купесига тегишли дизайн эканлиги маълум қилинган.