BMW компанияси Compact Sedan концепциясини тақдим этди

BMW компанияси Лос-Анджелесдаги мотор-шоу учун ҳеч қандай янгилик тайёрламади, у билан бироқ бир вақтда бўлиб ўтаётган Гуанчжоу автосалонида BMW Compact Sedan концептининг дебютини ўтказди.

Концепт-кар шиддаткор ташқи қиёфага эга бўлган. Мазкур дизайн ёруғлик диодли олд чироқлари, 20 дюм (1 дюм — 2,54 см)ли ғилдирак дисклари билан таъминланган.

BMW янги моделига қандай мотор ўрнатилгани ҳозирча маълум қилинмади. Бироқ айрим ахборот манбалари хабарига кўра, унинг етакчи намунасига 230 от кучига эга 2 литрли турбомотор ўрнатилади. Катта эҳтимол билан М-пакетли модификация учун 300 от кучига эга двигатель ўрнатиш таклиф қилинади.

Седаннинг стандарт жамланмасида олд ғилдираклар етакчилик қилади. Харидорлар ҳар икки томони “тортадиган” xDrive системали модификацияга ҳам буюртма беришлари мумкин.

Седан салони BMW учун анъанавий бўлган услубда ишлаб чиқилган. Бу ерда 8,8 дюмли мультимедиа комплекси дисплейи, шунингдек, iDrive контроллерини кўриш мумкин. Шунингдек, Head-Up Display проекцион экран ҳақида ҳам гап-сўзлар бор.

BMW седани Mercedes-Benz CLA ва Audi A3 Sedan автомобиллари билан рақобатга киришиши лозим. Compact Sedan концепти базаси асосидаги туркум маҳсулотлар 2016 йилнинг иккинчи ярмида савдога чиқарилиши белгиланган.